सोलापूर: सोलापूर जिल्ह्यात टोल वसुलीच्या वादातून पुन्हा एकदा हिंसाचार (Crime News) उसळल्याची घटना समोर आली आहे. सावळेश्वर टोल नाक्यावर टोल देण्याच्या कारणावरून (Solapur News) मालट्रक चालक आणि कर्मचाऱ्यांमध्ये झालेली वादावादी थेट मारहाणीपर्यंत पोहोचली. या घटनेत सिद्धू स्वामी (वय 32, रा. बसवकल्याण) या चालकाला बेदम मारहाण करण्यात आली असून तो गंभीर जखमी झाला आहे. त्याला तातडीने सोलापूरमधील रुग्णालयात दाखल करण्यात आले आहे. (Latest Marathi News)
मंगळवारी दुपारी सुमारे 4 वाजण्याच्या सुमारास ही घटना घडली. सोलापूरहून पुण्याकडे मालट्रक घेऊन निघालेल्या सिद्धू स्वामी यांची ट्रक सावळेश्वर टोल नाक्यावर आली असता, टोल भरण्याच्या मुद्द्यावरून त्यांचा कर्मचाऱ्यांशी वाद झाला. सुरुवातीला झालेली बाचाबाची काही क्षणांतच चिघळली आणि टोल कर्मचाऱ्यांनी चालकावर हल्ला केल्याचा आरोप आहे. या मारहाणीत स्वामी यांना गंभीर दुखापत झाली आणि मोठ्या प्रमाणात रक्तस्त्राव झाल्याचे प्रत्यक्षदर्शींनी सांगितले.
घटनेनंतर इतर ट्रक चालक संतप्त झाले. त्यांनी टोल नाक्यावरच तोडफोड करत रास्ता रोको केला. त्यामुळे महामार्गावर दोन्ही बाजूंनी सुमारे 2 किलोमीटरपर्यंत वाहनांच्या लांबच लांब रांगा लागल्या. काही काळ वाहतूक पूर्णपणे ठप्प झाली होती.
परिस्थिती नियंत्रणात आणण्यासाठी राज्य राखीव पोलीस दलाला पाचारण करण्यात आले. पोलीस निरीक्षक बाजीराव पोवार आणि त्यांच्या पथकाने घटनास्थळी धाव घेतल्यानंतर वाहतूक हळूहळू सुरळीत करण्यात आली. मात्र या घटनेमुळे ट्रक चालकांमध्ये तीव्र नाराजी पसरली आहे.
