पाचगणी : पाचगणी येथील महावितरणच्या कार्यालयात कनिष्ठ अभियंत्याला एका ग्राहकांने शिवीगाळ करत मारहाण केल्याची धक्कादायक घटना घडली आहे.
याबाबत पाचगणी पोलिस ठाण्यातून मिळालेली अधिक माहिती अशी की, कनिष्ठ अरविंद चंद्रकांत सुर्यवंशी हे कार्यालयात बसले होते. आज (दि.18 जुलै) सकाळी 10 च्या सुमारास शहरातील सिद्धार्थनगर येथे राहणाऱ्या सौरभ मोहन गायकवाड हा ग्राहक घरात लाईट नसल्याची तक्रार घेऊन आला असता अधिकाऱ्याने त्याला बिल घेऊन येण्यास सांगितले.
दहा मिनिटांनी तो बिल घेऊन आला असता सदर बिल शहरी विभागाचे असल्याने सुर्यवंशी यांनी त्याला शेजारच्या कार्यालयात जाण्यास सांगितले.यावर गायकवाड यांनी मला बिल का आणायला सांगितले म्हणून चिडून जाऊन अरविंद सुर्यवंशी यांना मारहाण केली असल्याची घटना घडली आहे.
सदर घटने बाबत शासकीय कामात अडथळा म्हणून गायकवाड याच्या विरुद्ध पाचगणी पोलिस ठाण्यात गुन्हा दाखल करण्यात आला. सहाय्यक पोलीस निरीक्षक दिलीप पवार यांच्या मार्गदर्शनाखाली पोलिस नाईक श्रीकांत कांबळे अधिक तपास करीत आहेत.
