Nagpur crime : नागपूर : लग्नाच्या जेमतेम दोन महिन्यांतच नवविवाहितेने घरात गळफास घेऊन आत्महत्या केल्याची घटना नागपूरच्या कोराडीत घडली आहे. वर्षा ऊर्फ सीमा मंगेश कडू (वय २६ ) असे मृत महिलेचे नाव आहे. श्री. गजानन अपार्टमेंट, प्रेमनगर, कोराडी इथं ती राहत होती.
मंगेश कडू हा एका राजकीय पुढाऱ्याच्या खासगी कार्यालयात लिपिक म्हणून काम करतो. त्याचे पहिले लग्न झाले होते. पहिल्या पत्नीकडून एक मुलगी आहे. सध्या त्यांचा घटस्फोट झाला आहे. दरम्यान, त्याचे नातेवाईक असलेली वर्षा हिच्याशी ओळख झाली. वर्षाचेही पहिले लग्न झाले होते. तीसुद्धा घटस्फोटीत असून एकटी राहत होती.
हळूहळू त्यांची ओळख वाढू लागली. त्यानंतर त्यांनी लग्न करण्याचे ठरवले. मंगेश आणि वर्षा यांनी दोन महिन्यांपूर्वी लग्न केले. कोराडीत एका सदनिकेत दोघांनीही संसार सुरु केला. मात्र, महिन्याभरातच दोघांचे क्षुल्लक कारणावरून खटके उडायला लागले. त्या रागातून वर्षाने शुक्रवारी सायंकाळी घरात कुणी नसताना गळफास घेऊन आत्महत्या केली. मंगेश घरी आला असता पत्नी गळफास घेतलेल्या अवस्थेत आढळून आली. या प्रकरणी कोराडी पोलिसांनी आकस्मिक मृत्यूची नोंद केली आहे.
