नागपूर : कुख्यात गुंड अरुण गवळीची तुरुंगातून मुदतपूर्व सुटका करण्याचे आदेश उच्च न्यायालयाच्या नागपूर खंडपीठाकडून देण्यात आले आहेत. तसेच उत्तर देण्यासाठी जेल प्रशासनाला चार आठवड्यांची मुदतही खंडपीठाने दिली आहे.
2006 च्या महाराष्ट्र शासन निर्णयाच्या आधारे कुख्यात गुंड अरुण गवळीने शिक्षेतून सुट देण्याची मागणी करणारी एक याचिका केली होती. अरुण गवळीच्या या याचिकेवर नागपूर खंडपीठात सुनावणी पुर्ण झाल्यानंतर कोर्टाने निकाल राखून ठेवला होता. त्यावर निर्णय देताना न्यायालयाने अरुण गवळी यांची मुदतपूर्व सुटका करण्याचे निर्देश दिले आहे मात्र त्या संदर्भात उत्तर देण्यासाठी जेल प्रशासनाला चार आठवड्यांचा अवधीही दिला आहे.
मुंबईतील नगरसेवक कमलाकर जामसांडेकर यांच्या हत्या प्रकरणासह इतर गुन्हेगारी कृत्य यासाठी अरुण गवळीला दोन वेळेला जन्मठेपेची शिक्षा झाली होती. सध्या अरुण गवळी नागपूर येथील तुरुंगात शिक्षा भोगत आहे.
काय आहे 2006 चा शासन निर्णय?
2006 च्या शासन निर्णयानुसार वयाची 65 वर्षे पूर्ण झालेल्या अशक्त, निम्मी शिक्षा भोगलेल्या कैद्याला शिक्षेत सूट मिळण्याची तरतूद आहे. त्यानुसारच कुख्यात गुंड अरुण गवळीने शिक्षेतून मुदतीपूर्व सुटकेची मागणी केली होती. उच्च न्यायालयाच्या निर्णयानंतर आता गवळीची तुरुंगातून सुटका होण्याची शक्यता आहे.
