Eknath Khadse: मुंबई : राष्ट्रवादी काँग्रेसचे ज्येष्ठ नेते आणि आमदार एकनाथ खडसे यांना हृदयविकाराचा झटका आल्याची खळबळजनक माहिती समोर आली आहे. खडसे हे जळगावातील त्यांच्या निवासस्थानी असताना त्यांना हृदयविकाराचा झटका आला. जळगाव येथील रुग्णालयात त्यांना दाखल करण्यात आले. मात्र, पुढील उपचारासाठी त्यांना मुंबईला हलविण्याचा निर्णय घेण्यात आला. दरम्यान, खडसे यांच्या कन्या रोहिणी खडसे यांनी याबाबतची माहिती मुख्यमंत्री एकनाथ शिंदे यांना दिली. त्यानंतर एअर अँम्ब्यूलन्सने त्यांना मुंबई येथे उपचारासाठी दाखल करण्यात आले आहे.
एकनाथ खडसे यांची प्रकृती सध्या स्थिर असून, त्यांच्यावर तज्ज्ञ डॉक्टरांच्या देखरेखीखाली उपचार केले जाणार असल्याची माहिती मिळत आहे. मुख्यमंत्री एकनाथ शिंदे साताऱ्यातील दरे गावात आहेत. त्यातच, रोहिणी खडसे यांनी एअर अॅम्बुलन्ससाठी मुख्यमंत्री एकनाथ शिंदे यांच्याशी संपर्क साधला. मुख्यमंत्र्यांनी याची तातडीनं दखल घेतली. त्यांनी प्रशासनाला एकनाथ खडसे यांच्यासाठी एअर अॅम्बुलन्सची व्यवस्था करण्याच्या सूचना दिल्या आहेत.
दोन दिवसांपासून एकनाथ खडसे यांच्या छातीत वेदना होत होत्या. त्यांचा रक्तदाब स्थिर आहे. खडसेंची प्रकृती सध्या स्थिर असून, पुढील उपचारासाठी बॉम्बे रूग्णालयात दाखल करण्यात येणार आहे, अशी माहिती हृदयरोगतज्ज्ञ विवेक चौधरी यांनी दिली.
गेल्या दोन ते तीन दिवसांपासून एकनाथ खडसे यांना छातीत त्रास होत होता. त्यानंतर आज दुपारी त्यांना हृदयविकाराचा झटका आला आहे. त्यांची प्रकृती सध्या स्थिर आहे. खडसे यांना हृदयविकाराचा झटका आल्याची माहिती समजताच त्यांच्या कार्यकर्त्यांनी रुग्णालयाबाहेर मोठी गर्दी केल्याचे पाहायला मिळाले. त्यानंतर आता खडसेंना उपचारासाठी मुंबईत दाखल करण्यात आल्याने कार्यकर्त्यांनी त्यांच्या प्रकृतीसाठी पूजा-अर्जा सुरू केली आहे.
