नाशिक: नाशिकमधील अशोक खरात प्रकरणाचा तपास दिवसेंदिवस अधिक तीव्र होत असून, विशेष तपास पथकाकडून (SIT) या प्रकरणातील विविध पैलूंवर सखोल (Ashok Kharat) चौकशी सुरू आहे. महिलांच्या लैंगिक शोषणाच्या आरोपांमुळे आधीच चर्चेत असलेल्या या प्रकरणात आता आर्थिक व्यवहार, मालमत्ता आणि संपर्क जाळ्याचीही छाननी केली जात आहे. आयपीएस अधिकारी तेजस्वी सातपुते यांच्या नेतृत्वाखालील पथकाने खरातची तब्बल 7 तास सखोल चौकशी केल्याची माहिती समोर आली आहे.
या चौकशीत तांत्रिक पुरावे, आर्थिक व्यवहारांची साखळी आणि मालमत्तेची माहिती गोळा करण्यावर भर दिला जात आहे. खरातचे जबाब नोंदवले जात असून, त्याच्या कथित नेटवर्कचा विस्तार किती आहे याचा शोध घेतला जात आहे. या प्रकरणामुळे राजकीय पातळीवरही मोठी खळबळ उडाली असून, राष्ट्रवादी काँग्रेसच्या नेत्या रुपाली चाकणकर यांना महिला आयोगाच्या अध्यक्षपदाचा राजीनामा द्यावा लागला आहे.
खरातसोबतचे फोटो आणि त्याच्या संस्थेशी असलेला संबंध यामुळे चाकणकरांवर विरोधकांकडून टीका होत आहे. त्यांना सहआरोपी करण्याची मागणीही काही महिला नेत्यांकडून पुढे येत आहे. या सर्व घडामोडींमुळे प्रकरणाचा राजकीय आणि सामाजिक प्रभाव अधिक वाढला आहे.
दरम्यान, चौकशीदरम्यान एक महत्त्वाचा टप्पा म्हणजे खरात आणि त्याच्या कार्यालयातील कर्मचारी नीरज जाधव यांची समोरासमोर चौकशी करण्यात आली. या वेळी दोघांमध्ये शाब्दिक वाद झाल्याची माहिती सूत्रांकडून मिळत आहे. नीरज जाधव हा या प्रकरणातील महत्त्वाचा दुवा मानला जात असून, त्याच्या माध्यमातून अनेक पुरावे समोर येण्याची शक्यता आहे.
सध्या खरात पोलीस कोठडीत असून त्याच्याकडून अधिक माहिती मिळवण्याचे प्रयत्न सुरू आहेत. त्याचे राजकीय संबंध, आर्थिक व्यवहार आणि संभाव्य सहकारी यांचा तपास सुरू असल्याने पुढील काही दिवसांत या प्रकरणात आणखी मोठे खुलासे होण्याची शक्यता आहे.
