बीड : बीडमध्ये भाजप नेत्या पंकजा मुंडे आणि राष्ट्रवादीचे नेते धनंजय मुंडे हे दोघे बहीण भाऊ एकाच मंचावर आले होते. शासन आपल्या दारी या कार्यक्रमाचे आयोजन करण्यात आले होते, यावेळी दोन्ही भावाबहिणींनी एकमेकांवर स्तुती सुमने उधळली. पहिल्यांदाच धनंजय मुंडे आणि पंकजा मुंडे एकमेकांवर मुक्तकंठाने स्तुती करत होते. यावेळी धनंजय मुंडे म्हणाले, यापुढे पंकजाताई आणि मी मिळून बीडचा विकास करणार आहोत, हे ऐकून उपस्थितांनी टाळ्यांचा प्रचंड कडकडाट केला.
पंकजा मुंडे यांनी या कार्यक्रमाला संबोधित करताना धनंजय मुंडे यांची स्तुती केली. मला मीडियाने विचारलं ताई तुम्ही या कार्यक्रमाला आलात हे प्रमुख आकर्षण आहे का? मी म्हटलं, मंचावर सर्व आमदार आहेत. त्यामध्ये माझा संवैधानिक रोल नाही. पाच वर्ष या जिल्ह्याचे पालकमंत्री म्हणून मी काम केलं.
परळीची सेवा करताना वैद्यनाथ तीर्थक्षेत्राचा विकास व्हावा असं मनात वाटायचं. तेव्हा फडणवीस मुख्यमंत्री होते. तेव्हा या कामाचं बीजारोपण केलं. धनंजय मुंडे यांचं अभिनंदन करते. आता ही योजना पुढे जाईल. अत्यंत चांगलं काम या माध्यमातून झालं पाहिजे. या वैद्यनाथाचा आशीर्वाद आपल्याला लाभला आहे, असं पंकजा मुंडे म्हणाल्या.
बीड जिल्ह्याचं कर्ज माझ्या आणि धनंजयच्या डोक्यावर
त्या पुढे बोलताना म्हणाल्या, परळीच्या विकासासाठी माझी कोणत्याही मंचावर जाण्याची तयारी आहे. हे दाखवण्यासाठी आले. मी जात धर्म पाहत नाही. कोणत्याही पक्षाच्या लोकांना त्रास दिला नाही. द्वेष मनात ठेवला नाही. या जिल्ह्याचं कर्ज माझ्या आणि धनंजयच्या डोक्यावर आहे. विकास तुमच्या पदरात देणं हे आमचं कर्तव्य आहे. आज परळीच्या विकासासाठी वंचिताचा वाली बनण्यासाठी खांद्याला खांदा लावून लावून काम करू, असं पंकजा मुंडे म्हणल्या.
माझीच नजर न लागो माझ्या वैभवाला : धनंजय मुंडे
यावेळी धनंजय मुंडे यांनीही जोरदार भाषण करत पंकजा यांचं तोंडभरून कौतुक केलं. जीवनात अनेक सभा आणि कार्यक्रम केले. पण शासन आपल्या दारी निमित्ताने पहिल्यांदा असा कार्यक्रम होत आहे. व्यासपीठावरील सर्वांना बोलावं असं वाटेल असा हा कार्यक्रम आहे. एवढी गर्दी पाहिल्यावर तोंडातून शब्द फुटू नये इतकी गर्दी आहे. माझीच नजर न लागो माझ्या वैभवाला, असं धनंजय मुंडे म्हणाले.
ते पुढे म्हणाले, बीड जिल्ह्यातील 36 हजार लाभार्थ्यांना प्रत्यक्ष लाभ दिला. या तिघांमुळे 1400 कोटीचा निधी आला. यापूर्वी एवढा निधी कधी आला नाही. एवढा निधी दिला त्यासाठी आभार मानतो. बीडच्या मागे ताकदीने उभे राहिला आहात. विकासाची गंगा तुम्ही देत आहात. थोडेसे आणखी हात ढिला करा. हा बीड जिल्हा मागास जिल्हा आणि ऊस तोड कामगारांचा जिल्हा म्हणून ओळखला जाणार नाही, एवढा आम्ही विकास करू, अशी ग्वाही धनंजय मुंडे यांनी दिली.
