Beed News : बीड : बीड (Beed) जिल्ह्यातील केज तालुक्यात एक धक्कादायक घटना उघडकीस आली आहे. हायव्होल्टेज विद्युत तारा चोरी करण्याच्या प्रयत्नात टॉवर कोसळून 2 जणांचा जागीच मृत्यू (Death) झाल्याची माहिती समोर आली आहे. या घटनेमुळे परिसरात मोठी खळबळ उडाली आहे. विशेष म्हणजे, या प्रकरणानंतर साथीदारांनी अपघाताचा बनाव करण्याचा प्रयत्न केला, मात्र पोलिस तपासात सत्य बाहेर आले.
मिळालेल्या माहितीनुसार, पुणे येथील 5 जणांचा गट केज तालुक्यातील नांदूर घाट परिसरात तारा चोरी करण्यासाठी आला होता. 28 मार्च 2026 रोजी रात्रीच्या सुमारास त्यांनी हायव्होल्टेज टॉवरवर चढून तारा कापण्यास सुरुवात केली. यावेळी अचानक टॉवर कोसळला. या अपघातात अविनाश पाटोळे आणि आकाश आडे या दोघांचा जागीच मृत्यू झाला.
घटनेनंतर उर्वरित 3 साथीदारांनी पोलिसांपासून बचाव करण्यासाठी ही घटना रस्ते अपघात असल्याचे भासवण्याचा प्रयत्न केला. त्यांनी मृतदेह एका कारमध्ये ठेवून परभणीकडे नेले. तेथे पोहोचल्यानंतर मृतदेह गाडीतच सोडून ते पसार झाले. मात्र, हा बनाव फार काळ टिकला नाही.
वाहन चालकाने मृतदेह रुग्णालयात नेण्याचा प्रयत्न केल्यानंतर नातेवाईकांना संशय आला. त्यानंतर पोलिसांनी चौकशी केली असता संपूर्ण प्रकार समोर आला. या घटनेनंतर परभणी आणि केज पोलिसांनी घटनास्थळी जाऊन पंचनामा केला असून पुढील तपास सुरू आहे.
सध्या फरार आरोपींचा शोध घेतला जात आहे. या प्रकरणामुळे बीड आणि परभणी जिल्ह्यात भीतीचे वातावरण निर्माण झाले असून, अशा प्रकारच्या घटनांवर नियंत्रण ठेवण्याची मागणी नागरिकांकडून होत आहे.
