जालना : माजी मंत्री तथा शरद पवार गटाचे आमदार राजेश टोपे यांच्या गाडीवर दगडफेक करण्यात आल्याच्या घटनेनंतर आता माजी मंत्री बबनराव लोणीकर यांच्या घरावर अज्ञात लोकांनी दगडफेक केल्याची घटना समोर आली आहे. अचानक आलेल्या अज्ञाताच्या घोळक्याने माजी मंत्री बबनराव लोणीकर आणि त्यांचे बंधू यांच्या घरावर दगडफेक केली आहे. त्यामुळे घटनास्थळी सध्या तणावाचे वातावरण आहे. जालना जिल्हा बँकेच्या निवडणुकीवरून हा राडा झाला असल्याचे बोलले जात आहे. तर, राजेश टोपेंच्या कार्यकर्त्यांनी हा हल्ला केल्याचा आरोप लोणीकर यांच्याकडून करण्यात येत आहे.
