पुणे : राष्ट्रवादी काँग्रेसचे अध्यक्ष तथा राज्याचे उपमुख्यमंत्री अजित पवार यांचे धाकटे सुपुत्र जय पवार यांचा साखरपुडा आज पार पडत आहे.पुण्यात आज सायंकाळी काही ठराविक मित्र, कुटुंबातील सदस्य आणि पक्षातील मोजक्या नेत्यांच्या उपस्थितीत हा सोहळा पार पडणार आहे. सोशल मीडिया कंपनी सांभाळणारे प्रवीण पाटील यांची मुलगी ऋतुजा पाटील हिच्यासोबत जय पवार लवकरच विवाहबंधनात अडकणार आहेत. या सोहळ्यासाठी पवार कुटुंबातील सर्वच सदस्य उपस्थित राहणार आहेत.
पवार कुटुंबात आलेल्या वादळानंतर आता घरात होत असलेल्या मंगल कार्यालयामुळे संपूर्ण पवार कुटुंब पुन्हा एकदा एकत्र येणार आहे.
जय पवार यांच्या होणाऱ्या पत्नी ऋतुजा पाटील या सोशल मीडिया कंपनी सांभाळणारे साताऱ्यातील फलटणचे प्रविण पाटील यांच्या कन्या आहेत. ऋतुजा पाटील या उच्चशिक्षित आहेत. जय पवार आणि ऋतुजा पाटील यांची गेल्या काही वर्षांपासून ओळख आहे. ऋतुजा पाटील यांची बहीण ही केसरी टूर्सच्या पाटील कुटुंबाच्या सूनबाई आहेत.दरम्यान आजच्या साखरपुड्याला आत्या सुप्रिया सुळे या संपूर्ण कुटुंबासह उपस्थित राहणार आहेत.तसेच या साखरपुड्याच्या निमित्ताने अजित पवार आणि शरद पवार एकत्र येणार असल्याने या भेटीकडे सर्वांचच लक्ष लागल आहे.
साखरपुडा ठरल्यानंतर जय पवार आणि त्यांच्या होणाऱ्या पत्नी ऋतुजा पाटील यांनी शरद पवार यांची भेट घेतली होती. 13 मार्च रोजी ही भेट झाली होती. या भेटी वेळी शरद पवार यांच्या पत्नी प्रतिभा पवार ह्या सुद्धा उपस्थित होत्या. जय पवार आणि ऋतुजा पाटील यांनी स्वतः शरद पवार यांची भेट घेऊन साखरपुड्याचे निमंत्रण दिलं होतं.या भेटीचे फोटो सुप्रिया सुळे यांनी समाज माध्यमांवर शेअर केले होते.
