MS Dhoni IPL 2026 : आयपीएल चाहत्यांसाठी मोठी बातमी समोर आली आहे. चेन्नई सुपर किंग्जकडून संघाचा सर्वात यशस्वी कर्णधार महेंद्रसिंग धोनी पुन्हा एकदा (IPL) आयपीएलमध्ये खेळताना दिसणार आहे. गेल्या काही महिन्यांपासून धोनी आयपीएल 2026 मध्ये सहभागी होणार का? या चर्चेला आता पूर्णविराम मिळाला आहे.
चेन्नई सुपर किंग्जचे सीईओ काशी विश्वनाथन यांनी सांगितले की, (MS Dhoni) “एम. एस. धोनीने आम्हाला कळवले आहे की तो पुढील सीझनसाठी उपलब्ध आहे.” त्यामुळे थालाचे चाहते पुन्हा एकदा आपला आवडता कॅप्टन मैदानावर पाहण्यासाठी सज्ज झाले आहेत.
मागील आयपीएल सीझनमध्ये (MS Dhoni) धोनीने ‘अनकॅप्ड’ खेळाडू म्हणून सहभाग घेतला होता. ऋतुराज गायकवाड अनुपस्थित असताना काही सामन्यांमध्ये त्याने संघाचे नेतृत्वदेखील केले होते. आता तो आयपीएल 2026 मध्ये पुन्हा कर्णधार म्हणून खेळणार का? की फक्त खेळाडू म्हणून दिसणार, याबाबत संघाने अद्याप अधिकृत घोषणा केलेली नाही.
धोनीच्या नेतृत्वाखाली चेन्नई सुपर किंग्जने आतापर्यंत पाच वेळा (IPL)आयपीएलचे विजेतेपद पटकावले आहे. 2010, 2011, 2018, 2021 आणि 2023 या वर्षांत संघ विजेता ठरला. तसेच 2010 आणि 2014 मध्ये चॅम्पियन्स लीग टी-20 चे जेतेपदही संघाने जिंकले. सीएसकेवर बंदी असताना (2016-2017) धोनी रायझिंग पुणे सुपरजायंट्सकडून खेळला होता.
चेन्नईसाठी खेळलेल्या 248 सामन्यांत धोनीने 4865 धावा केल्या आहेत. त्याचा शांत स्वभाव, अचूक निर्णय घेण्याची क्षमता आणि मैदानावरील रणनीती यामुळे तो आजही आयपीएलच्या इतिहासातील सर्वात यशस्वी कर्णधार मानला जातो. धोनी आणि चेन्नई सुपर किंग्ज हे समीकरण म्हणजे चाहत्यांसाठी भावना आहे. ‘येलो आर्मी’साठी थाला पुन्हा मैदानात उतरणार असल्याने संपूर्ण सोशल मीडियावर आनंद आणि उत्साहाचं वातावरण निर्माण झालं आहे.
