पुणे : राज्यात विधानसभा निवडणुकीचे वारे वाहू लागले आहे. महायुती आणि महाविकास आघाडीतील घटकपक्षांमध्ये सध्या जागावाटपावरून बैठकाचा सपाटा सुरु आहे. दुसरीकडे विधानसभा निवडणुकीसाठी इच्छुकांनी देखील लगबग सुरु केली आहे. अशातच आता शिवसेना उद्धव ठाकरे गटाचे नेते वसंत मोरे हे पुण्यातील खडकवासला मतदारसंघातून निवडणूक लढवणार असल्याचं बोललं जात आहे. यासाठी त्यांनी जोरदार तयारी देखील सुरु केल्याची माहिती सूत्रांनी दिली आहे.
सूत्रांनी दिलेल्या माहितीनुसार, वसंत मोरे यांनी शिवसेना पक्षप्रमुख उद्धव ठाकरे आणि खासदार संजय राऊत यांच्याकडे खडकवासला विधानसभेचं तिकीट मागितल्याची माहिती समोर आली आहे. सध्या या मतदारसंघात भाजपचे भीमराव (आण्णा) धोंडिबा तापकीर हे विद्यमान आमदार आहेत. त्यामुळे वसंत मोरे यांना या मतदारसंघातून तिकीट मिळणार का? याकडे देखील सर्वांचे लक्ष लागून राहिले आहे.
शिवसेना ठाकरे गटाने पुण्यातील दोन मतदारसंघावर दावा केला आहे. यामध्ये खडकवासला आणि कोथरूडचा समावेश आहे. खडकवासला येथून वसंत मोरे निवडणूक लढवणार आहेत. तर कोथरूडमधून तीन-चार नावांची चर्चा आहे. यापूर्वी २०१९ मध्ये वसंत मोरे यांनी हडपसरमधून विधानसभा निवडणूक लढवली होती. यंदा मात्र त्यांनी खडकवासला मतदारसंघातून निवडणूक लढवण्याची इच्छा व्यक्त केली आहे.
