Pune Crime : शहर पोलीस ठाण्याच्या हद्दीतील लोणी काळभोर, वाघोलीसह पाच पोलीस ठाण्याच्या हद्दीत महिलांच्या गळ्यातील मंगळसूत्र चोरी करणारी आंतरराज्यीय टोळी गुन्हे शाखा युनिट 6 च्या पोलिसांनी जेरबंद केली आहे. गुरुवारी (ता. 18) हि कारवाई करण्यात आली असून याप्रकरणी पोलिसांनी दोघांना ताब्यात घेतले आहे. तसेच त्यांनी केलेले 6 गुन्हे उघडकीस आले आहेत अशी माहिती गुन्हे शाखा युनिट 6 चे पोलीस निरीक्षक वाहिद पठाण यांनी दिली. (Pune Crime)
सुभाष चंद्रकांत जाधव (वय -39), रा. शिरापुर धुमाळ, ता. शिरूर, जि. बीड), लहु संतराम गायकवाड (वय-30, रा. रायमोह, ता. शिरूर, जि. बीड) अशी अटक करण्यात आलेल्या आरोपींची नावे आहेत. त्यांच्याकडून तब्बल 160 ग्रॅम वजनाचे सुमारे 20 लाख 4 हजार रुपये किमतीचे सोन्याचे दागिने जप्त करण्यात आले आहेत.
पोलिसांनी दिलेल्या माहितीनुसार, पुणे शहरात कोरेगाव भीमा येथील जयस्तंभास अभिवादनासाठी येणाऱ्या भाविकांच्या गर्दीत, तसेच बसस्टॉप व इतर गजबजलेल्या ठिकाणी महिलांच्या गळ्यातील मंगळसूत्र चोरीच्या घटनांमध्ये वाढ झाली होती. या गुन्ह्यांना आळा घालण्यासाठी वरिष्ठांच्या आदेशानुसार गुन्हे शाखा युनिट-6कडून विशेष तपास मोहीम राबविण्यात आली.
पोलीस निरीक्षक वाहीच पठाण यांच्या मार्गदर्शनाखाली सहाय्यक पोलीस निरीक्षक मदन कांबळे व त्यांच्या पथकाने सातत्याने गोपनीय व तांत्रिक माहिती संकलित केली. त्याआधारे गुरुवारी पथक गस्त घालीत असताना पथकास मिळालेल्या गोपनीय व तांत्रिक माहितीच्या आधारे वरील दोन्ही आरोपींना ताब्यात घेत्न्यात आले. त्यांचेकडे कौशल्यपुर्ण तपास करुन तब्बल 160 ग्रॅम वजनाचे सुमारे 20 लाख 4 हजार रुपये किमतीचे सोन्याचे दागिने जप्त करण्यात आले आहेत.
दरम्यान, त्यांच्याकडे अधिक चौकशी केली असता त्यांनी शहर पोलीस ठाण्याच्या हद्दीतील वाघोली, लोणीकंद, लोणी काळभोर, हडपसर, स्वारगेट, या पोलीस ठाण्याच्या हद्दीत महिलांच्या गळ्यातील मंगळसूत्र चोरी केल्याची कबुली पोलिसांना दिली आहे.
सदरची कामगिरी अपर पोलीस आयुक्त (गुन्हे) पंकज देशमुख, पोलीस उप आयुक्त (गुन्हे) निखिल पिंगळे, सहा. पोलीस आयुक्त (गुन्हे) राजेंद्र मुळीक, यांचे मार्गदर्शनाखाली गुन्हे शाखा, युनिट-6 कडील पोलीस निरीक्षक वाहीच पठाण, सहायक पोलीस निरीक्षक मदन कांबळे, पोलीस अंमलदार कानिफनाथ कारखेले, नितीन मुंढे, बाळासाहेब सकटे, विनायक साळवे, सारंग दळे, गिरीष नाणेकर, सुहास तांबेकर, ऋषीकेश ताकवणे, ऋषीकेश व्यवहारे, नितिन धाडगे, सोनाली नरवडे व प्रतिक्षा पानसरे यांनी केली आहे.
