Hadapsar News:हडपसर, (पुणे) : घरी सोडण्याचा बहाणा करून मित्राने त्याच्या मैत्रिणीवर बलात्कार केल्याची घटना घडली आहे. तर त्याच्या साथीदाराने विनयभंग करीत तरुणीच्या मनास लज्जा उत्पन्न होईल, असे वर्तन केल्याची घटना सोमवारी (ता. ०६) रात्री साडेबारा वाजण्याच्या सुमारास सटवाई नगर परिसरात घडली आहे. याप्रकरणी पिडीत तरुणीने हडपसर पोलीस ठाण्यात फिर्याद दिली आहे. त्यानुसार पोलिसांनी मांजरी (ता. हवेली) येथील दोन आरोपींना अटक केली आहे.
अभिषेक गणेश जगताप (वय २० वर्ष, रा. मांजरी बुद्रुक, ता. हवेली) व निलेश नामदेव यादव, (वय २३, रा. कुंजीर वस्ती, मांजरी बुद्रुक, ता. हवेली) अशी अटक करण्यात आलेल्या दोन आरोपींची नावे आहेत.
पोलिसांनी दिलेल्या माहितीनुसार, फिर्यादी यांची जगताप याच्याशी ओळख आहे. यावेळी सोमवारी रात्री साडेबारा वाजण्याच्या सुमारास फिर्यादी यांना घरी सोडण्याचा बहाणा केला. यावेळी जगताप याने त्याच्या एका मित्राला फोन करून बोलावून घेतले. यावेळी अभिषेक याने फिर्यादीवर बलात्कार केला. तसेच निलेश यादव याने मनास लज्जा उत्पन्न होईल, असे वर्तन केल्याचे फिर्यादीत म्हटले आहे.
दरम्यान, याप्रकरणी फिर्यादीने दिलेल्या तक्रारीनुसार दोन्ही आरोपींना हडपसर पोलिसांनी ताब्यात घेतले आहे. तपास सहायक पोलीस निरीक्षक दाभाडे करीत आहेत.
