केडगाव : पुणे सोलापूर महामार्गावर तिहेरी वाहनांचा अपघात झाला आहे. हा अपघात चौफुला येथील जगदंबा हॉटेल समोर शुक्रवारी (ता. 06) सकाळी साडेआठ वाजण्याच्या सुमारास झाला आहे. या अपघातात एकाचा जागीच मृत्यू झाला आहे तर दोनजण गंभीर जखमी झाले आहेत.
मिळालेल्या माहितीनुसार, पुणे सोलापूर राष्ट्रीय महामार्गावरून आयशर टेम्पो पुण्याकडून सोलापूरच्या दिशेने भरधाव वेगाने चालला होता. आयशर टेम्पो चौफुला येथील जगदंबा हॉटेल समोर आला असता, चालकाचे त्याच्या ताब्यातील आयशरवरील नियंत्रण सुटले.
View this post on Instagram
त्यानंतर आयशर डीव्हाडर तोडून थेट सोलापूरच्या दिशेकडे जाणाऱ्या रस्त्यावर गेला. त्याचवेळी पुण्याकडून सोलापूरच्या दिशेकडे जाणाऱ्या एका ट्रकचा व आयशरचा भीषण अपघात झाला. तसेच या ट्रक ला पाठीमागून आलेल्या एका ट्रकने मागून धडक दिली. त्यामुळे असा तिहेरी अपघात असल्याची माहिती समोर येत आहे.
दरम्यान, अपघातात मृत्यू व जखमी झालेल्यांची नावे अद्याप समजू शकलेली नाही. मात्र अपघात झालेल्या ठिकाणी प्रचंड वाहतूक कोंडी झाली होती. या घटनेची माहिती मिळताच, यवत पोलीस घटनास्थळी दाखल झाले असून मदतकार्य सुरु आहे. तसेच अपघातातील वाहने क्रेनच्या सहाय्याने काढण्याचे काम युद्धपातळीवर सुरु आहे.
सविस्तर वृत्त थोड्या वेळातच
