शिक्रापूर : शिक्रापूर (ता. शिरुर) येथील शिक्रापूर-तळेगाव ढमढेरे रस्त्यावर पीएमपी व दुचाकीची समोरासमोर धडक बसून झालेल्या अपघातात तिघांचा मृत्यू झाला. प्रथमेश नंदकुमार शेलार, हर्षल दिगंबर घुमे व आयुष अतुल जाधव अशी अपघतातात मृत्यू झालेल्यांची नावे आहेत. हा अपघात शुक्रवार (दि.९) रोजी झाला.
शिक्रापूर येथील शिक्रापूर-तळेगाव ढमढेरे रस्त्याने तिघे मित्र दुचाकीहून चाललेले असताना त्रिमूर्ती गार्डन मंगल कार्यालयसमोर समोरील वाहनाला ओव्हरटेक करत असताना युवकांची दुचाकी समोरून तळेगाव ढमढेरे बाजूने आलेल्या पीएमपी बसला धडकल्याने भीषण अपघात झाला. सदर अपघातात प्रथमेश नंदकुमार शेलार (वय १८), हर्षल दिगंबर घुमे (वय १९, दोघे रा. तळेगाव ढमढेरे, ता. शिरुर जि. पुणे) आणि आयुष अतुल जाधव (वय १६, रा. मावळ ता. मावळ जि. पुणे) या तिघांचा जागीच मृत्यू झाला. याबाबत रात्री उशिरापर्यंत गुन्हा दाखल करण्याचे काम सुरु असल्याचे शिक्रापूर पोलिसांनी सांगितले. पुढील तपास पोलीस करीत आहेत.
