शिक्रापूर (पुणे): शिक्रापूर (ता. शिरुर) पोलीस स्टेशन हद्दीमध्ये गांजाची वाहतूक करणाऱ्या दोन स्कॉर्पिओ शिक्रापूर पोलिसांनी जप्त केल्या असून 53 किलो गांजा तब्यात घेतला आहे. याबरोबरच वैष्णव वैजनाथ ढाकणे, स्वप्नील गोरक्षनाथ खेडकर, हर्षद देविदास खेडकर, शुभम बंडू जवरे, तुषार रामनाथ जवरे व अक्षय कांतीलाल आव्हाड या सहा जणांना बेड्या ठोकल्या आहेत.
शिक्रापूर पोलीस स्टेशन हद्दीमध्ये पुणे- नगर महामार्गावरून दोन पांढऱ्या रंगाच्या स्कॉर्पिओमधून काही युवक गांजा घेऊन जाणार असल्याची माहिती पोलीस हवालदार मिलिंद देवरे यांना प्राप्त झाली होती. त्यांनतर पोलीस निरीक्षक दिपरतन गायकवाड यांच्या मार्गदर्शनाखाली शिक्रापूर येथे पुणे-नगर महामार्गावर सापळा लावला असता त्यांना दोन पांढऱ्या रंगाच्या स्कॉर्पिओ आल्याचे दिसून आल्या. पोलिसांनी दोन्ही स्कॉर्पिओमध्ये तपासणी केली असता त्यामध्ये गांजा आढळून आला.
दरम्यान पोलिसांच्या पथकाने दोन्ही स्कॉर्पिओसह त्यामध्ये असलेला तब्बल 53 किलो गांजा जप्त केला. गांजा वाहतूक करणाऱ्या युवकांना देखील अटक करण्यात आली आहे. गांजा वाहतूक करणाऱ्यांविरुद्ध गुन्हा दाखल केला असून पुढील तपास पोलीस करत आहे.
