पुणे :
राष्ट्रवादीचे नेते शरद पवार यांच्यावर सातत्याने टीका करणारे प्रसिद्ध वक्ते नामदेव जाधव यांच्या तोंडाला राष्ट्रवादी शरद पवार गटाकडून काळं फासण्यात आलं आहे. पवारांवर सतत टीका केल्यामुळे जाधवांविरोधात राष्ट्रवादी शरद पवार गटाचे कार्यकर्ते आक्रमक झाले आहेत. पुण्यातील येरवडा परिसरातील भांडारकर संस्थेच्या कार्यक्रमासाठी नामदेव जाधव पोहचले होते.
त्यावेळी माध्यमांशी बोलत असतानाच अचानक राष्ट्रवादी काँग्रेस शरद पवार गटाच्या कार्यकर्त्यांनी त्यांच्यावर हल्ला चढवला. मात्र पोलिसांनी नामदेव जाधव यांचा बचाव करत घटनास्थळावरून त्यांना बाजूला केले. शरद पवार गटाच्या कार्यकर्त्यांनी जाधव यांच्या तोंडाला काळं फासत असताना पवारांच्या समर्थनार्थ जोरदार घोषणाबाजी करण्यात आली. यामध्ये पवार गटाच्या महिला कार्यकर्त्यांचाही समावेश होता.
नामदेव जाधव यांनी पवारांवर केले होते गंभीर आरोप
राज्यात सध्या आरक्षणाचा मुद्दा चांगलाच पेटला आहे. त्यातच प्राध्यापक नामदेव जाधव यांनी शरद पवार यांच्या जातीचा खोटा दाखला माध्यमांसमोर प्रसिद्ध करत शरद पवार यांचा ओबीसी असा उल्लेख केला होता. तसेच पवारांवर सतत गंभीर आरोप केले होते. यामुळे राष्ट्रवादी शरद पवार गटाचे कार्यकर्ते नामदेव जाधव यांच्याविरोधात चांगलाच आक्रमक झाल्याचं पाहायला मिळत आहे.
त्या घटनेचा निषेध व्यक्त करण्यासाठी पवार गटाच्या कार्यकर्त्यांनी नामदेव जाधव यांच्या कार्यक्रमाला विरोध केला. तसेच त्यांनी जाधव यांच्या तोंडाला काळे फासण्याचा इशाराही दिला होता. यानंतर भांडारकर संस्थेने कोणताही अनुचित प्रकार घडू नये म्हणून नामदेव जाधवांचा कार्यक्रम रद्द करण्यात आला होता. त्याच दरम्यान नवी पेठेत राष्ट्रवादी काँग्रेस पक्षाच्या कार्यकर्त्यांनी नामदेव जाधव यांच्या चेहर्याला काळं फासलं.
