गोरख जाधव
डोर्लेवाडी, (पुणे) : “राम जन्मला गं सखे, राम जन्मला”, “सियावर रामचंद्र की जय” अशा जयघोषांनी डोर्लेवाडी परिसर दुमदुमून गेला. रामनवमीनिमित्त संत सावतामाळी मंदिरात श्रीराम नवमी उत्सव अत्यंत भक्तिभाव व उत्साहात पार पडला.
या प्रसंगी मंदिराचे विविध फुलांनी आकर्षक सजावट करण्यात आली होती. उत्सवात ह.भ.प. बाळासो नाळे महाराज यांचे श्रीराम जन्मकथेवर भावपूर्ण कीर्तन झाले. कीर्तन ऐकण्यासाठी परिसरातील असंख्य भाविकांनी मोठ्या संख्येने उपस्थिती लावली.
दुपारी 12 वाजता श्रीराम जन्माच्या दिव्य क्षणी जय घोषात गुलाल आणि पुष्पवृष्टीसह महाआरती करण्यात आली. या वेळी संपूर्ण वातावरण राममय झाले होते. रामजन्मानंतर महिलांनी पारंपरिक पाळणा गीते गात श्रीरामाच्या मूर्तीचा पाळणा हलवत भक्तीचा ठेका धरला.
दिवसभर मंदिरात श्री चैतन्य गोंदवलेकर महाराज यांच्या जपाचा कार्यक्रम सतत सुरु होता. भाविकांसाठी डाळ, लाडू, मुरमुरे आणि रामफळांचा प्रसाद तसेच महाप्रसादाचेही वाटप करण्यात आले. परिसरातील विविध भजनी मंडळांनी भक्तिगीते सादर करून वातावरण भक्तिमय ठेवले.
