योगेश पडवळ
Pune News : पाबळ : टोमॅटो पिकाला चांगला बाजारभाव मिळत असल्याने शिरूर व जुन्नर तालुक्यातील शेतकऱ्यांनी प्राधान्याने टोमॅटोचे उत्पादन घेतले. मात्र, टोमॅटोचे बाजारभाव कोसळल्याने शेतकऱ्यांना आता टोमॅटोची तोडणी तसेच वाहतूक देखील परवडत नसल्याने टोमॅटो उत्पादक शेतकरी चिंतेत आहे. कधी मान्सूनची हुलकावणी, कधी अतिवृष्टीचा फटका तर कधी दुष्काळ अशा दुष्टचक्रात शेतकरी अडकला आहे.
शेतकऱ्यांवर टोमॅटो फेकून देण्याची वेळ…
यंदा ऑगस्ट महिन्यात मान्सूनने चांगलीच ओढ दिली. निसर्गाच्या या चक्रातून बाहेर पडल्यावर आता शेतमालाचे दर कोसळल्याची चिंता बळीराजाला भेडसावत आहे. कांदा आणि टोमॅटो पिकाची लागवड करणाऱ्या शेतकऱ्यांना या समस्यांना वारंवार सामोरे जावे लागत आहे. महिनभरापूर्वी भाव खाल्लेला टोमॅटो आता शेतकऱ्यांना रडवत आहे. पुणे जिल्ह्यातील शिरूर आणि जुन्नरमध्ये टोमॅटो फेकून देण्याची वेळ शेतकऱ्यांवर आली आहे.
दरम्यान, मागील महिन्यात आवक कमी झाल्यामुळे टोमॅटोचे दर तेजीत होते. टोमॅटोला विक्रमी भाव मिळाला होता. सुमारे ३ हजार ते अडीच हजार रुपये प्रती क्रेट दराने टोमॅटो विकला गेला होता. यामुळे केंद्र सरकारने टोमॅटोचे दर नियंत्रित करण्याचे प्रयत्न केले. त्यामुळे अवघ्या महिनाभरातच टोमॅटोसह भाजीपाल्याच्या दरात मोठी घसरण झाली. आता टोमॅटो रस्त्यावर फेकण्याची वेळ शेतकऱ्यांवर आली आहे.
सविंदणे (ता. शिरूर) येथील शेतकरी नाथा लंघे यांच्यावर टोमॅटोची बाग सोडून देण्याची वेळ आली. ३ हजार रुपये दर असलेल्या टोमॅटोचा क्रेट आता ७० रुपये प्रती कॅरेट विकला जात आहे. यामुळे टोमॅटो उत्पादक शेतकरी हवालदिल झाला आहे. टोमॅटोचे भाव वाढल्यानंतर केंद्र सरकारने त्वरित टोमॅटोची आयात केली अन् भावातील घसरण थांबवली. आता टोमॅटोला भाव नसतानाही सरकारने उपाययोजना करण्याची गरज आहे.
टॉमेटोला पुन्हा मातीमोल भाव मिळत असल्यामुळे शेतकरी आक्रमक झाले आहे. नारायणगाव बाजार समितीमध्ये सरकारचा निषेध व्यक्त केला गेला. भाव पडल्यामुळे हातात टोमॅटो घेऊन केंद्र आणि राज्य सरकारच्या विरोधात शेतकऱ्यांनी घोषणा दिल्या. गेल्या दीड महिन्यांच्या तुलनेत आता फळभाज्यांचे दर कमी झाले आहेत.
प्रक्रिया उद्योगाची गरज…
केंद्र सरकारने प्रधानमंत्री कौशल्य विकास योजनेअंतर्गत महाराष्ट्र कृषी कौशल्य व विकास कार्यक्रम हाती घेतला होता. त्यातून शेतकऱ्यांना प्रक्रिया उद्योगासाठी प्रोत्साहन मिळणार होते. शिरूर व जुन्नर तालुक्यात विकणारा टोमॅटो हा उत्तम दर्जाचा आहे. परंतु मोठ्या बाजारपेठेत विक्रीसाठी नेणे कमी वेळात शक्य होत नाही. त्यातून बाजारभावामुळे परवडत देखील नाही. शिरूर व जुन्नर तालुक्यात भाजीपाला प्रक्रिया उद्योगाची उभारणी झाल्यास शेतकऱ्यांचा भाजीपाल प्रक्रिया करून ठेवता येईल.
सरकारने शेतकऱ्यांना धरले वेठीस…
कवठे येमाई येथील राष्ट्रवादीचे उपाध्यक्ष राजेश सांडभोर म्हणाले की, मागील हंगामात टोमॅटोचे दर कमी झाले होते. त्या काळात टोमॅटो शेताच्या बांधावर फेकून दिले. त्यानंतर टोमॅटोचे दर वाढले. यामुळे पुन्हा भांडवल गोळा करून टोमॅटोची लागवड केली. आता कष्ट करून टोमॅटो उत्तम पिकवला आहे. मात्र, पुन्हा टोमॅटोचे दर कोसळल्याने शेतीचे भांडवल नष्ट होणार आहे. सरकारने शेतकऱ्यांना वेठीस धरले असून, टोमॅटो मातीमोल ठरत आहे.
