अमित मुंडीक
पुणे: पुणे शहरातील वाहतूक सुधारणा (Pune News) आणि खड्डेमुक्त पुणे अभियानाच्या अनुषंगाने आज (दि. १८ नोव्हेंबर २०२५) महापालिका आयुक्त मा. नवल किशोर राम (Naval Kishor Ram) यांनी स्वारगेट ते भवानीपेठ परिसरातील रस्त्यांची व्यापक स्थळ पाहणी केली. स्वारगेट, टिळक रोड, शुक्रवार पेठ, राष्ट्रभूषण चौक, काशेवाडी, न्यू टिंबर मार्केट, रामोशी गेट तसेच शंकरशेठ रोड, सेव्हन लव्ह चौक परिसरातील पंचवर्क, रोड वाइडनिंग, डांबरीकरण आणि चेंबर समपातळीकरणाच्या कामांचे प्रत्यक्ष परीक्षण करण्यात आले.
आयुक्तांनी या सर्व रस्त्यांचा पूर्ण रुंदीने विकास करण्याचे स्पष्ट निर्देश दिले. पावसाच्या पाण्याचे चेंबर, पिण्याच्या पाण्याचे वॉल्व्ह चेंबर समपातळीत करण्याचे आदेशही देण्यात आले. सेव्हन लव्ह चौक येथे वर्धमान बिल्डिंगजवळ डावीकडे वळणाऱ्या वाहनांसाठी रुंद चॅम्पर तयार करून फुटपाथ आत सरकवण्याचे उत्तम काम केल्याबद्दल आयुक्तांनी कौतुक केले.
दरम्यान, वारजे परिसरातील खड्डे भरण्याच्या कामात मोठ्या प्रमाणावर निष्काळजीपणा झाल्याने संबंधित कंत्राटदाराला रु. १ लाख दंड ठोठावण्यात आला. पुन्हा अशी चूक झाल्यास संस्थेचा थेट काळ्या यादीत समावेश होईल, अशी कडक चेतावणी देण्यात आली.सदर कामावर देखरेख करणाऱ्या उप-अभियंता व कनिष्ठ अभियंत्यास कारणे दाखवा नोटीस देण्यात आली होती. त्यांचा खुलासा समाधानकारक नसल्याने दोघांनाही निलंबित करण्यात आले.
हिराबाग डांबर कोठीतील नवीन सेन्सर पेवर खरेदी करूनही कार्यान्वित न केल्याबद्दल नाराजी व्यक्त करून ते तात्काळ वापरात आणण्याचे तसेच भंगार साहित्याचा लिलाव करण्याचे निर्देश देण्यात आले. कोठी परिसर स्वच्छ करून वापरात आणण्याचे आदेशही दिले. या पाहणी प्रसंगी अतिरिक्त आयुक्त (विशेष) ओमप्रकाश दिवटे, मुख्य अभियंता अनिरुद्ध पावसकर, अधीक्षक अभियंता जाशित जाधव यांसह पथ विभागातील सर्व संबंधित अधिकारी उपस्थित होते.
