पुणे: पुणे महानगरपालिका शहरातील रस्ते दुरुस्ती, पाइपलाइन टाकणे आणि पुनर्बांधणीची कामे पूर्ण करण्यासाठी अंतिम मुदत १ जूनवरून ७ जूनपर्यंत वाढवत आहे. शहरातील विविध विभागांना कामं वेळेत पूर्ण करण्यात अपयश आल्याने पुणे महानगरपालिकेने ही मुदतवाढ दिली आहे. पावसाळ्यापूर्वीची ही महत्त्वाची कामे वेळेत पूर्ण व्हावीत यासाठी प्रशासनाने हा निर्णय घेतला आहे.
सोमवारी पुणे महानगरपालिकेचे अतिरिक्त आयुक्त ओमप्रकाश दिवटे यांच्या अध्यक्षतेखाली आढावा बैठक पार पडली. या बैठकीस रस्ता, ड्रेनेज, जलपुरवठा आणि वीज विभागांचे प्रमुख अधिकारी उपस्थित होते. या बैठकीत कामाची सद्यस्थिती पाहता सात दिवसांची मुदतवाढ देण्यात आली. ओमप्रकाश दिवटे यांनी सांगितले की, “यंदा मान्सून नेहमीपेक्षा लवकर दाखल झाला आहे. त्यामुळे अनेक ठिकाणी कामांमध्ये अडथळा निर्माण झाला. काही कामे अंतिम टप्प्यात आहेत, मात्र आता कोणताही विलंब न करता ती पूर्ण झाली पाहिजेत. जर रस्त्यांचे योग्यरीत्या पुनर्बांधणी नसेल, तर संबंधित कंत्राटदारांना देयके दिली जाणार नाहीत.”
पुणे महानगपालिकेने यापूर्वी सर्व खोदकाम व संबंधित कामांसाठी १ जून ही अंतिम तारीख निश्चित केली होती. मात्र बाणेर, कोथरूड, येरवडा आणि हडपसर या भागांत अद्याप खोदकाम सुरू असून त्यामुळे वाहतुकीस अडथळा निर्माण होतो आहे, तसेच पावसात नागरिकांच्या सुरक्षिततेचा प्रश्न निर्माण होतो आहे. पुणे महानगपालिकेने सर्व विभागांना आता स्थिती अहवाल सादर करण्यास सांगितले आहे. शिवाय, कामाच्या प्रगतीवर लक्ष ठेवण्यासाठी आणि कामात दिरंगाई करणाऱ्या किंवा निकृष्ट दर्जाचे काम करणाऱ्या कंत्राटदारांवर कारवाई करण्याचे निर्देशही देण्यात आले आहेत.
हा निर्णय घेत शहरातील नागरिकांना पावसाळ्यात योग्य रस्ते मिळावेत, सुरक्षितता अबाधित राहावी आणि वाहतुकीत अडथळा निर्माण होऊ नये, याचा प्रयत्न पुणे महानगरपालिका करत आहे. आता ही कामे वाढवलेल्या मुदतीत पूर्ण होतात की नाही, हे पाहणे महत्त्वाचे ठरेल.
