इम्रान आत्तार
भोर: तालुक्यातील 8 पंचायत समिती गणांचे आरक्षण सोमवारी (13 ऑक्टोबर) भोर-महाड मार्गावरील अभिजीत मंगल कार्यालयात जाहीर करण्यात आले. या वेळी भोर उपविभागीय अधिकारी डॉ. विकास खरात, तहसीलदार राजेंद्र नजन, नायब तहसीलदार अरुण कदम यांच्यासह प्रशासनातील अधिकारी व राजकीय पक्षांचे प्रतिनिधी मोठ्या संख्येने उपस्थित होते. (Bhor Panchayat Samiti Reservation)
यापूर्वीच भोर पंचायत समिती सभापती पद सर्वसाधारण महिलांसाठी राखीव असल्याचे जाहीर झाले होते. त्यामुळे भोर तालुक्यातील 8 पंचायत समिती गणांच्या आरक्षणाकडे सर्वांचे लक्ष लागले होते. अखेर आज हे आरक्षण निश्चित झाल्याने राजकीय वर्तुळात चर्चांना उधाण आले आहे.
पंचायत समिती गणांचे जाहीर झालेले आरक्षण…
1) वेळू गण – सर्वसाधारण
2) नसरापूर गण – सर्वसाधारण
3) भोंगवली गण – सर्वसाधारण
4) कामथडी गण – सर्वसाधारण महिला
5) भोलावडे गण – नागरिकांचा मागास प्रवर्ग
6) शिंद गण – सर्वसाधारण महिला
7) उत्रोली गण – सर्वसाधारण महिला
8) कारी गण – नागरिकांचा मागास प्रवर्ग महिला
राजकीय समीकरणे बदलणार…
या आरक्षणामुळे अनेक इच्छुक उमेदवारांचे राजकीय गणित बदलले असून, काहींना संधी मिळणार तर काहींचे उमेदवारीचे स्वप्न धुळीस मिळण्याची शक्यता आहे. स्थानिक पातळीवरील आघाड्या, पक्षांतर, आणि नवे गट– तट तयार होण्याचे संकेतही राजकीय वर्तुळात उमटत आहेत. आता या आरक्षणाच्या पार्श्वभूमीवर पुढील काही दिवसांत भोर तालुक्यातील सत्तासमीकरणांमध्ये कोणता नवा अध्याय लिहिला जातो, हे पाहणे औत्सुक्याचे ठरणार आहे.
