अमित मुंडीक
येरवडा: येरवडा पोलीस ठाणे हद्दीत अंमली पदार्थ विरोधी मोहिमेअंतर्गत पोलिसांनी मोठी कारवाई करत तब्बल 20,70,500 रुपयांचा प्रतिबंधित गुटखा आणि तंबाखुजन्य पदार्थ जप्त केले आहेत. ही कारवाई दि. 24 नोव्हेंबर 2025 रोजी वरिष्ठ अधिकाऱ्यांच्या आदेशानुसार करण्यात आली.
अंमली पदार्थ विरोधी पथक-२, गुन्हे शाखा पुणे शहराचे पोलीस निरीक्षक सुदर्शन गायकवाड, सहा. पोलीस निरीक्षक नितीनकुमार नाईक यांच्या मार्गदर्शनाखाली पथकातील पोलीस अंमलदारांनी ही कारवाई वेद प्रोव्हीजन स्टोअर्सच्या मागील गोडाऊनमध्ये केली. हे ठिकाण सर्वे नंबर १४, नाईक नगर, येरवडा येथे असून दुकानामागील गोडाऊनमध्ये तंबाखूचा मोठा साठा लपवण्यात आला होता.
कारवाईदरम्यान जमनाराम उर्फ गणेश बलराम जाट (वय 25, रा. नाईक नगर येरवडा) या आरोपीला पोलिसांनी ताब्यात घेतले. त्याच्याकडून मोठ्या प्रमाणावर प्रतिबंधित गुटखा व तंबाखू उत्पादने हस्तगत करण्यात आली आहेत.
या प्रकरणी येरवडा पोलीस ठाण्यात भारतीय न्यायसंहिता कलम 123, 223, 274, 275, ‘सिगारेट व अन्य तंबाखुजन्य उत्पादने कायदा’ कलम 7(2), 20(2) तसेच ‘अन्न सुरक्षा मानके अधिनियम 2006’ अंतर्गत कलम 26(2)(i)(iv) आणि 59 नुसार गुन्हा दाखल करण्यात आला आहे.
