प्रतिनिधी अमित मुंडीक
पुणे: पुणे (Pune News) महानगरपालिका सार्वत्रिक निवडणूक 2025-26 च्या पार्श्वभूमीवर दिनांक 18 डिसेंबर 2025 रोजी महापालिका आयुक्त नवल किशोर राम यांनी निवडणूक विषयक कामकाजाच्या अनुषंगाने पोलीस विभागाशी समन्वय साधण्यासाठी महत्त्वाची बैठक घेतली.
या बैठकीस रंजन कुमार शर्मा, पोलीस सह आयुक्त, संदीप भाजीभाकरे, पोलीस उपआयुक्त (विशेष शाखा), अर्चना गायकवाड, पुणे प्रादेशिक परिवहन अधिकारी, तसेच विविध संबंधित विभागांचे प्रतिनिधी उपस्थित होते.
बैठकीत निवडणूक कार्यक्रम कालावधीची माहिती देण्यात आली. निवडणूक आयोगाच्या आदेशानुसार पोलीस विभागाशी संबंधित विविध कक्ष स्थापन करणे, तसेच त्या कक्षांमध्ये समन्वय अधिकाऱ्यांची नेमणूक करण्याबाबत मार्गदर्शन करण्यात आले.
आचारसंहितेच्या प्रभावी अंमलबजावणीसाठी व्हिडिओ सर्व्हेलन्स पथक, भरारी पथक, स्टॅटिक सर्व्हेलन्स टीम, निवडणूक निर्णय अधिकारी कार्यालय, झोनल अधिकारी, निवडणूक निरीक्षक, ईव्हीएम स्ट्रॉंग रूम, साहित्य वाटप व स्वीकृती केंद्र, मतमोजणी केंद्र, एक खिडकी योजना, ईव्हीएम वाहतुकीसाठी सुरक्षा व्यवस्था तसेच संवेदनशील मतदान केंद्रांची निश्चिती यासंदर्भातील कार्यवाही पोलीस विभागामार्फत होणार असल्याचे स्पष्ट करण्यात आले.
तसेच उमेदवारांच्या प्रचारासाठी जाहीर सभा, तात्पुरती प्रचार कार्यालये, ध्वनिक्षेपक परवाने, मिरवणूक/रोड शो, तसेच प्रसारमाध्यमांतील जाहिरातींचे पूर्व प्रमाणन इत्यादी कामे पोलीस विभागाकडून करण्यात येणार आहे. यावेळी पोलीस सह आयुक्त रंजन कुमार शर्मा यांनी पुणे महानगरपालिकेस निवडणूक प्रक्रिया पारदर्शक व सुरळीत पार पाडण्यासाठी संपूर्ण सहकार्य देण्यात येईल, असे सांगितले.
राजकीय पक्षांच्या प्रतिनिधींशी स्वतंत्र बैठक घेण्यात आली. या बैठकीत निवडणूक 2025-26 संदर्भातील प्राथमिक माहिती सादर करण्यात आली. उप आयुक्त तथा नोडल अधिकारी (थकबाकी ना हरकत प्रमाणपत्र) यांनी थकबाकी ना हरकत प्रमाणपत्रासाठी तयार करण्यात आलेल्या ऑनलाइन प्रणालीची माहिती दिली.
या ऑनलाइन प्रणालीमुळे नाव नोंदणी व अर्ज प्रक्रिया सुलभ आणि सोपी झाल्याचे नमूद करत उपस्थित राजकीय पक्षांच्या प्रतिनिधींनी पुणे मनपाच्या या नाविन्यपूर्ण उपक्रमाचे स्वागत केले.
बैठकीदरम्यान शपथपत्राचा नमुना, थकबाकी ना हरकत प्रमाणपत्र, जात पडताळणी प्रमाणपत्र, पोलीस चारित्र्य पडताळणी प्रमाणपत्र, नाव दुरुस्ती आदी विषयांवर प्रश्न उपस्थित करण्यात आले. या सर्व प्रश्नांचे निराकरण अतिरिक्त महापालिका आयुक्त (विशेष) तथा निवडणूक अधिकारी आणि इतर मनपा अधिकाऱ्यांनी केले.
