वेल्हे: पुण्यातील (Pune News) वेल्हे तालुक्यातील प्रसिद्ध पर्यटन स्थळ असलेल्या मढेघाट परिसरात ट्रेकिंगसाठी गेलेल्या शालेय विद्यार्थ्यांवर आग्या मोहोळाच्या मधमाशांनी भीषण हल्ला केल्याची धक्कादायक घटना घडली आहे. एका खासगी ट्रेकिंग क्लबच्या माध्यमातून सुमारे 50 पेक्षा जास्त विद्यार्थी आणि त्यांचे मार्गदर्शक मढेघाट ते उपंडा असा ट्रेक करण्यासाठी गेले होते. काल संध्याकाळी मढे घाट उतरत असताना मध्यभागी असलेल्या झाडीतून जात असताना झाडावरील मधमाश्यांनी थेट विद्यार्थ्यांवर हल्ला चढवला. या अनपेक्षित संकटामुळे विद्यार्थ्यांमध्ये मोठी पळापळ झाली आणि भीतीचे वातावरण पसरले.
या घटनेची माहिती मिळताच स्थानिक ग्रामस्थ मदतीसाठी धावून आले. तोरण माची हॉटेलचे मालक अभिजीत भेके यांनी सोशल मीडियावरून मदतीचे आवाहन केले, त्यानंतर केळद गावचे माजी सरपंच रमेश शिंदे आणि इतर नागरिकांनी कड्यामध्ये अडकलेल्या विद्यार्थ्यांना सुरक्षित बाहेर काढण्यासाठी शर्थीचे प्रयत्न केले. या हल्ल्यात 35 पेक्षा जास्त विद्यार्थी जखमी झाले असून त्यापैकी 8 ते 10 जणांना मधमाशांनी मोठ्या प्रमाणात दंश केला आहे.
जखमी विद्यार्थ्यांना 108 रुग्णवाहिका आणि खासगी गाड्यांमधून तातडीने वेल्हे येथील ग्रामीण रुग्णालयात नेण्यात आले. तालुका वैद्यकीय अधिकारी डॉ. अंबादास देवकर यांनी दिलेल्या माहितीनुसार, अधिक त्रास होत असलेल्या २ विद्यार्थ्यांना पुढील उपचारांसाठी पुण्यातील खासगी रुग्णालयात हलवण्यात आले आहे. इतर सर्व विद्यार्थ्यांची प्रकृती आता स्थिर असून त्यांच्यावर वेल्हे येथे उपचार सुरू आहेत.
