Manchar Election: मंचर (पुणे) : मंचर नगर परिषदेच्या निवडणुकीत अत्यंत चुरशीची लढत पाहायला मिळाली. उपमुख्यमंत्री एकनाथ शिंदे यांची प्रचार सभा येथे झाली होती आणि त्याचा शिवसेनेला काही प्रमाणात फायदा झाल्याचे निकालातून दिसून आले. शिवसेनेच्या उमेदवार राजश्री दत्ता गांजाळे या नगराध्यक्षपदी विजयी झाल्या आहेत. मात्र, शिवसेनेला नगर परिषदेत स्पष्ट बहुमत मिळवता आलेले नाही. त्यामुळे निवडणुकीनंतर राजकीय समीकरणे बदलताना दिसत आहेत. Manchar Election
हेही वाचा- थर्टी फर्स्टची पार्टी यंदा कोरडीच? दारूचा बेत फसला; पुण्यात लाखो रुपयांचा मद्यसाठा जप्त
या निवडणुकीत नगराध्यक्षपदासाठी अनेक उमेदवार रिंगणात होते. शिवसेनेच्या राजश्री गांजाळे यांना 4135 मते मिळाली. त्यांच्या निकटवर्तीय प्रतिस्पर्धी राष्ट्रवादी काँग्रेसच्या मोनिका सुनील बाणखेले यांना 3925 मते मिळाली. तर अपक्ष उमेदवार प्राची आकाश थोरात यांनी 3224 मते मिळवत शेवटपर्यंत जोरदार लढत दिली. प्राची थोरात यांना मिळालेली मते लक्षवेधी ठरली असून त्यांनी प्रमुख पक्षांना आत्मपरीक्षण करण्यास भाग पाडले आहे.
याशिवाय शिवसेना उद्धव बाळासाहेब ठाकरे गट आणि राष्ट्रवादी काँग्रेस शरदचंद्र पवार गटाच्या आघाडीच्या उमेदवार रजनीगंधा राजाराम बाणखेले यांना 738 मते मिळाली. काँग्रेसच्या फार्जीन इकबाल मुलाणी यांना 333 मते तर अपक्ष उमेदवार जागृती किरण महाजन यांना 301 मते मिळाली. दरम्यान, नगराध्यक्षपदी विजय मिळवूनही राजश्री गांजाळे यांचे पती दत्ता गांजाळे यांचा पराभव झाला असून त्यांना 135 मते मिळाली.
नगरसेवकांच्या निकालांकडे पाहता, एकूण 17 जागांपैकी राष्ट्रवादी काँग्रेसचे 9 नगरसेवक निवडून आले आहेत. शिवसेनेचे 4, शिवसेना उद्धव बाळासाहेब ठाकरे पक्षाचा 1, राष्ट्रवादी काँग्रेस शरदचंद्र पवार गटाचा 1 तर 2 अपक्ष नगरसेवक निवडून आले आहेत. त्यामुळे नगर परिषदेत राष्ट्रवादी काँग्रेसची संख्या जास्त असली तरी नगराध्यक्षपद शिवसेनेकडे गेले आहे.
प्रचारानंतरही नगराध्यक्षपद निसटले
माजी सहकारमंत्री दिलीप वळसे पाटील, माजी खासदार शिवाजीराव आढळराव पाटील, शरद बँकेचे अध्यक्ष देवेंद्र शहा, भीमाशंकर कारखान्याचे अध्यक्ष बाळासाहेब बेडे तसेच भाजपचे नेते डॉ. ताराचंद कराळे आणि जयसिंग एरंडे यांनी प्रचारसभा व जनसंपर्कासाठी मोठे प्रयत्न केले होते. मात्र, एवढ्या जोरदार प्रचारानंतरही नगराध्यक्षपद त्यांच्या हातातून निसटले. या निवडणुकीत राष्ट्रवादी काँग्रेसने 8 जागांवर विजय मिळवला आहे. निवडून आलेल्या 3 अपक्ष उमेदवारांपैकी 2 जण पूर्वी राष्ट्रवादी काँग्रेसशी संबंधित कार्यकर्ते असल्याने नगरपंचायतीत राष्ट्रवादी काँग्रेसचे स्पष्ट बहुमत निर्माण होण्याची शक्यता आहे. भाजपला या निवडणुकीत एकही जागा मिळवता आली नाही.
या निकालानंतर मंचरमध्ये विजयी उमेदवारांच्या समर्थकांनी फटाके फोडून आणि गुलाल उधळून आनंद साजरा केला. महायुतीतील पक्षांसाठी हा निकाल काहीसा आनंद आणि काहीसा नाराजी देणारा ठरल्याचे राजकीय वर्तुळात बोलले जात आहे.
