पुणे: पुणे शहरातील लोणी काळभोर (Loni Kalbhor News) आणि हडपसर परिसरात (Hadapsar News) भाईगिरी करत दहशत माजवणाऱ्या सराईत टोळीप्रमुखासह (Pune Crime) त्याच्या एका साथीदाराला खंडणी विरोधी पथकाने अटक केली आहे. या कारवाईत पोलिसांनी दोघांकडून 2 पिस्टल आणि 1 जिवंत काडतूस जप्त केले असून परिसरात मोठी खळबळ उडाली आहे. (Latest Marathi News)
अटक करण्यात आलेल्यांची नावे शुभम कैलास कामठे, वय 30, राहणार कदमवाक वस्ती, लोणी काळभोर आणि शुभम श्रीमंत रसाळ, वय 19, राहणार पावर हाऊस शेजारी, फुरसुंगी अशी आहेत. शुभम कामठे हा सराईत गुन्हेगार असून लोणी काळभोर आणि हडपसर परिसरात आपल्या टोळीच्या जोरावर दहशत निर्माण करत होता. त्याच्यावर विविध स्वरूपाचे एकूण 8 गंभीर गुन्हे दाखल आहेत. तसेच त्याच्या टोळीविरुद्ध 2021 मध्ये मोक्का अंतर्गत कारवाई करण्यात आली होती. बेकायदा शस्त्र बाळगल्याच्या गुन्ह्यात तो गेल्या 7 महिन्यांपासून फरार होता.
खंडणी विरोधी पथकाच्या पोलीस निरीक्षक वर्षा देशमुख यांच्या मार्गदर्शनाखाली 18 डिसेंबर रोजी दुपारी पथक पेट्रोलिंग करत होते. त्यावेळी पोलीस अंमलदार आझाद पाटील आणि पवन भोसले यांना माहिती मिळाली की, सराईत गुन्हेगार शुभम कामठे हा रॉयल स्टे इन हॉटेलसमोर कोणाची तरी वाट पाहत असून त्याच्याकडे पिस्टल आहे. मिळालेल्या माहितीच्या आधारे पोलिसांचे पथक तातडीने घटनास्थळी दाखल झाले.
पोलिसांना पाहताच दोघेही पळून जाण्याचा प्रयत्न करू लागले. मात्र पोलिसांनी पाठलाग करून दोघांनाही ताब्यात घेतले. झडतीदरम्यान शुभम कामठे याच्या कमरेला एक पिस्टल आणि पॅन्टच्या खिशात 1 जिवंत काडतूस आढळून आले. त्याच्यासोबत असलेल्या शुभम रसाळ याच्याकडूनही एक पिस्टल जप्त करण्यात आले. या प्रकरणी फुरसुंगी पोलीस ठाणे येथे आर्म अॅक्ट अंतर्गत दोघांविरुद्ध गुन्हा दाखल करण्यात आला आहे.
ही कारवाई अपर पोलीस आयुक्त पंकज देशमुख, पोलीस उपायुक्त निखील पिंगळे आणि सहायक पोलीस आयुक्त राजेंद्र मुळीक यांच्या मार्गदर्शनाखाली करण्यात आली. या यशस्वी कारवाईत पोलीस निरीक्षक वर्षा देशमुख यांच्यासह खंडणी विरोधी पथकातील अधिकारी व कर्मचारी सहभागी होते. पुढील तपास सुरू असून आरोपींकडून आणखी गुन्ह्यांची उकल होण्याची शक्यता पोलिसांनी व्यक्त केली आहे.
