लोणी काळभोर, ता. 31: पुणे–सोलापूर महामार्गावर (Loni Kalbhor) भरधाव वेगाने येणाऱ्या कारने दुचाकीला धडक दिल्याने महाविद्यालयीन विद्यार्थी गंभीर जखमी झाल्याची घटना घडली आहे. ही घटना लोणी काळभोर (ता. हवेली) ग्रामपंचायत हद्दीतील शिवशक्ती टायर्ससमोर 27 मार्चला दुपारी एक वाजण्याच्या सुमारास घडली. अपघातानंतर कार चालक हा मदत न करता घटनास्थळावरून पळून गेला होता.
तेजस संतोष साळुंखे (वय 21) असे जखमी झालेल्या विद्यार्थ्याचे नाव आहे. याप्रकरणी तेजसचे काका संभाजी सुरेश साळुंखे (वय 37, मांजरी खुर्द, ता. हवेली)) यांनी लोणी काळभोर पोलिस ठाण्यात फिर्याद दिली आहे. त्यानुसार अज्ञात चालकाच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, तेजस साळुंखे हा लोणी काळभोर (ता. हवेली) पृथ्वीराज कपूर हायस्कूल येथे बी.कॉम अंतिम वर्षाचा पेपर देऊन मोटारसायकलने घरी परतत होता. शिवशक्ती टायर्ससमोर पुणे–सोलापूर महामार्गावर पोहोचताच एम.एच. 12एच.झेड. 0890 क्रमांकाच्या काळ्या रंगाच्या स्विफ्ट कारने वाहतूक नियमांकडे दुर्लक्ष करून तेजसच्या दुचाकीला जोरदार धडक दिली.
या अपघातात तेजस गंभीर जखमी झाला, तर त्याचा मित्र अभय पांडे (वय 21) यालाही दुखापत झाली. अपघातात तेजसच्या उजव्या हाताच्या पंजाला खोल जखम झाली असून चेहऱ्याच्या उजव्या बाजूस फ्रॅक्चर, हनुवटीवर जखम, छातीला मार तसेच डोक्याला गंभीर दुखापत होऊन रक्तस्त्राव झाला. त्याचा मित्र अभय पांडे याच्या उजव्या खांद्याला फ्रॅक्चर व डोळ्याच्या वर जखम झाली आहे. अपघातानंतर जखमींना प्रथम विश्वराज रुग्णालयात दाखल करण्यात आले होते. तेजसची प्रकृती गंभीर असल्याने पुढील उपचारासाठी त्याला पुण्यातील जहांगीर रुग्णालयात हलविण्यात आले असून त्याच्यावर सध्या उपचार सुरू आहेत.
दरम्यान, अपघात घडल्यानंतर कार चालकाने जखमींना कोणतीही मदत न करता घटनास्थळावरून पळून गेला आहे. या अपघातात दुचाकीचेही मोठे नुकसान झाले आहे. याप्रकरणी आज्ञात चालकाच्या विरोधात मोटरवाहन अधिनियम, 1988 चे कलम 119,134,177, 184 व भारतीय न्याय संहिता (बी एन एस), 2023 चे कलम 125(a),125(b),281, 324(4) प्रमाणे गुन्हा दाखल करण्यात आला आहे.
