Khandala Ghat Train Accident : पुणे : मुंबई-पुणे रेल्वे मार्गावरील खंडाळा घाटात गुरुवारी दुपारी एक धक्कादायक प्रकार घडला. पुण्याहून मुंबईकडे जाणाऱ्या मालगाडीचे लोणावळा ते कर्जत दरम्यान पळसदरी घाटात ब्रेक अचानक निकामी झाले. घाटातील उतारावर गाडीचा वेग वाढल्याने काही काळ ती नियंत्रणाबाहेर गेली. या घटनेमुळे रेल्वे प्रशासनात एकच खळबळ उडाली. (Goods Train Incident)
माहितीनुसार, तीन इंजिन जोडलेली केएलएमजी (KLMG) मालगाडी घाटातून खाली उतरत असताना ब्रेक यंत्रणेत बिघाड झाला. उतार असल्याने गाडीचा वेग झपाट्याने वाढला. परिस्थिती गंभीर बनू शकते, अशी शक्यता निर्माण झाली होती. दरम्यान, या घटनेचा व्हिडिओ सोशल मीडियावर प्रसारित झाला असून त्यात गाडी वेगात धावताना दिसत आहे.
प्रसंगाचे गांभीर्य लक्षात घेऊन लोको पायलट, ट्रेन मॅनेजर आणि तांत्रिक कर्मचाऱ्यांनी तातडीने उपाययोजना केल्या. गाडीचा वेग कमी करण्यासाठी कर्जतदरम्यान ओव्हरहेड वीजपुरवठा काही काळासाठी बंद करण्यात आला. समन्वय साधून अखेर ही मालगाडी कर्जतच्या पुढे सुरक्षितरीत्या थांबवण्यात आली. सुदैवाने या घटनेत कोणतीही जीवितहानी झाली नाही आणि सर्व कर्मचारी सुरक्षित आहेत.
या प्रकाराची मध्य रेल्वेकडून गंभीर दखल घेण्यात आली आहे. ब्रेक यंत्रणेत बिघाड कसा झाला आणि त्यामागील नेमके कारण काय, याचा तपास सुरू करण्यात आला आहे. घाटातील मार्गावर विशेष काळजी घेतली जाते, त्यामुळे ही घटना अधिक चिंतेची मानली जात आहे. रेल्वे कर्मचाऱ्यांच्या तत्परतेमुळे मोठा अपघात टळल्याची भावना व्यक्त केली जात आहे.
