गणेश सुळ
Kedgaon News : केडगाव : ऊसाचे आगार म्हणून ओळखल्या जाणार्या दौंड तालुक्यात दसर्यापासून कारखान्यांची धुराडी पेटण्याची तयारी सुरू झाली आहे. मात्र, या वर्षीच्या अत्यल्प पावसामुळे उत्पादन घटणार आहे. यंदा पावसाने पाठ फिरवल्याने ऊसाची अपेक्षित वाढ झाली नाही. साखर भरण्याची वेळ असतानाच पाणी न मिळाल्याने वजन आणि साखर उतार्यावरही परिणाम जाणवणार आहे. त्यातच तालुक्यातील गुर्हाळे हे ऊस उत्पादक शेतकर्यांना चांगला बाजारभाव देत असल्याने या वर्षी मोठ्या प्रमाणावर शेतकर्यांनी कारखाना हंगाम सुरू होण्याच्या आधीच गुर्हाळाला ऊस घालण्यास सुरुवात केली आहे. परिणामी, तालुक्यातील साखर कारखान्यांपुढे गळीत हंगामाला गुर्हाळांचा मोठा फटका बसण्याची शक्यता आहे.
ऊस उत्पादक शेतकरीवर्गाची पुन्हा गुर्हाळाकडे वाटचाल
दौंड तालुक्यात भीमा पाटस सहकारी कारखान्यासह अनुराज शुगर (यवत), श्रीनाथ म्हस्कोबा (पाटेठाण) आणि दौंड शुगर (आलेगाव) असे चार साखर कारखाने आहेत. गेल्या वर्षी भीमा पाटस कारखाना सुरू झाला आणि गुर्हाळाबरोबरच इतर साखर कारखान्यांच्या गळीत हंगामाला याचा फटका बसला गेला. मात्र, या वर्षी गुर्हाळाने ऊस उत्पादक शेतकर्यांना 3000 रुपयांपासून ते 3100 रुपयांपर्यंत बाजारभाव दिला आहे. परिणामी, दौंड तालुक्यातील ऊस उत्पादक शेतकरीवर्ग पुन्हा गुर्हाळाकडे वाटचाल करू लागला आहे.
दौंड तालुक्यातील गुर्हाळांची दुकानदारी बंद करायची असेल तर साखर कारखान्यांना ऊस उत्पादक शेतकर्यांना गुर्हाळांच्या बरोबरीत अपेक्षित बाजारभाव देणे गरजेचे आहे. गुर्हाळाच्या तोडीत जर साखर कारखान्यांनी बाजारभाव दिला, तर शेतकरीवर्ग साखर कारखान्यांना ऊस घालेल व कारखान्याच्या गळीत हंगामांचे आपले उद्दिष्ट पूर्ण करेल, हे नक्की.
यंदाचे ऊस गाळप करणे ठरणार आव्हानात्मक
दौंड तालुक्यामध्ये साधारण 450 ते 500 गुर्हाळ आहेत. 24 तासांत 15 ते 25 टनांपर्यंत गुर्हाळे ऊस गाळप करत असतात आणि बाजारभावही 3100 रुपयांच्या वरून मिळतो आहे. यामुळे कारखान्याला यंदाचे ऊस गाळप करणे आव्हानात्मक ठरणार आहे. कारखान्याने जर 3500 रुपयेच्या आसपास बाजारभाव दिला, तर गुर्हाळाला फटका बसू शकतो. शिवाय तालुक्यांत 4 कारखाने व 500 गुऱ्हाळ असल्याने जो जास्त भाव देईल, तोच ऊस नेईल, अशी परस्थिती उद्भवण्याची शक्यता आहे.
संजय थोरात, अध्यक्ष, अखिल भारतीय मराठा महासंघ दौंड (ऊस उत्पादक शेतकरी)
