उरुळी कांचन, ता. 30 : ज्या डॉक्टरांना समाजात ‘देवदूत’ मानले जाते, त्याच (Indapur News) पेशाला डाग लावणारी एक संतापजनक घटना भिगवण (ता. इंदापूर) येथे घडली आहे. उरुळी कांचन येथील एका नामांकित हॉस्पिटलच्या डॉक्टरांनी आपल्या लाल रंगाच्या स्कोडा या चारचाकीने एका वयोवृद्ध दाम्पत्याच्या दुचाकीला जोराची धडक दिली. मात्र, जखमींना उपचार देण्याऐवजी किंवा मदत करण्याऐवजी, त्यांना आरेरावी करून डॉक्टर घटनास्थळावरून पसार झाल्याची घटना घडली.
भिगवण (ता. इंदापूर) ग्रामपंचायत हद्दीतील राशीन-भिगवण रस्त्यावरील अंबिका मच्छी खानावळ परिसरात रविवारी (ता. 15) रोजी सायंकाळी साडेचार वाजण्याच्या सुमारास घटना घडली.
मिळालेल्या माहितीनुसार, उरुळी कांचन येथे संबंधित डॉक्टरांचे मोठे रुग्णालय आहे. रविवारी (ता. 15) कामानिमित्त भिगवण येथे गेले होते. सायंकाळी साडेचार वाजण्याच्या सुमारास राशीन-भिगवण रस्त्यावरील अंबिका मच्छी खानावळ परिसरात त्यांच्या चारचाकीने एका वयोवृद्ध दाम्पत्याच्या दुचाकीला पाठीमागून धडक दिली. या धडकेमुळे दुचाकीवरील पती-पत्नी दोघेही रस्त्यावर कोसळले. यामध्ये पत्नीच्या गुडघ्याला गंभीर दुखापत झाली असून पतीलाही मोठा मुका मार लागला. अपघातामुळे दुचाकीचेही मोठे नुकसान झाले. अपघात झाला तेव्हा बघ्यांची गर्दी जमली.
रुग्णांच्या नातेवाईकांनी दिलेल्या माहितीनुसार, माणुसकीच्या नात्याने जखमींना दवाखान्यात नेण्याऐवजी डॉक्टर यांनी गाडीतून खाली उतरून जखमींची विचारपूस करण्याऐवजी त्यांच्या हातावर अवघे 500 रुपये टेकवले. डॉक्टरांनी तिथे आरेरावीची भाषा केली आणि कोणतीही वैद्यकीय मदत न देता माझे नातेवाईक पोलीस निरीक्षक, उपनिरीक्षक, अधिकारी आहेत. असे म्हणून उलट त्यांनाच दम देऊन आपली गाडी घेऊन तिथून पळ काढला.
दरम्यान, “डॉक्टर हे जीव वाचवणारे असतात, पण उरुळी कांचनच्या या डॉक्टरांनी दाखवलेल्या वागणुकीमुळे संपूर्ण डॉक्टर समुदायाची मान खाली गेली आहे,” अशी भावना स्थानिक नागरिकांनी व्यक्त केली आहे. या घटनेनंतर जखमी दाम्पत्याच्या नातेवाईकांनी तीव्र संताप व्यक्त केला असून, अशा बेजबाबदार डॉक्टरांविरुद्ध कारवाई होणार का याकडे नागरिकांचे लक्ष लागले आहे.
