Haveli Panchayat Samiti : लोणी काळभोर, ता. 23 : हवेली तालुका पंचायत समितीच्या सत्तासमीकरणात नवे राजकीय वारे वाहू लागले असून खानापूर गणाचे सदस्य युवराज नारायण वांजळे यांची गटनेतेपदी निवड झाल्याने तालुक्यातील राजकारणात मोठी कलाटणी मिळाली आहे. या निवडीमुळे आगामी सभापतीपदाच्या निवडणुकीकडे सर्वांचे लक्ष लागले असून राजकीय हालचालींना वेग आला आहे.
सोमवारी पुण्यातील राष्ट्रवादी काँग्रेस पार्टीच्या कार्यालयात झालेल्या बैठकीत सर्वानुमते वांजळे यांच्या नावावर शिक्कामोर्तब करण्यात आले. या बैठकीस महाराष्ट्र प्रदेश राष्ट्रवादी काँग्रेसचे उपाध्यक्ष सुरेश घुले, जिल्हा परिषदेचे माजी अध्यक्ष जालिंदर कामठे, माजी उपाध्यक्ष शुक्राचार्य वांजळे, राष्ट्रवादीचे हवेली तालुकाध्यक्ष दिलीप वाल्हेकर, नवनिर्वाचित सदस्य युवराज काकडे, मनोज ऊर्फ कृषिराज चौधरी, कोमल कांबळे, सुषमा मुरकुटे, अमोल टेकाळे, विद्या गायकवाड, कदमवाकवस्तीचे माजी सरपंच नंदू काळभोर, शिंदवणेचे माजी सरपंच अण्णा महाडिक यांच्यासह पक्षाचे पदाधिकारी मोठ्या संख्येने उपस्थित होते.
हवेली पंचायत समितीच्या एकूण 12 जागांपैकी राष्ट्रवादी काँग्रेस पार्टी (अजित पवार गट) ने सर्वाधिक 6 जागांवर विजय मिळवला आहे. तर भारतीय जनता पक्षाला 4, शिवसेना (एकनाथ शिंदे गट) ला 1 जागा मिळाली असून 1 उमेदवार अपक्ष म्हणून विजयी झाला आहे. अपक्ष सदस्य विद्या गायकवाड यांनी राष्ट्रवादीला उघड पाठिंबा दिला असून शिवसेनेच्या सदस्याकडूनही ‘मूक पाठिंबा’ मिळाल्याची चर्चा राजकीय वर्तुळात सुरू झाली आहे. त्यामुळे राष्ट्रवादीने बहुमताचा ‘मॅजिक फिगर’ पार केल्याचे स्पष्ट झाले आहे.
याच पार्श्वभूमीवर हवेली पंचायत समितीचा पुढील सभापती राष्ट्रवादीचाच होणार, हे जवळपास निश्चित मानले जात आहे. मात्र, सभापतीपदासाठी पक्षांतर्गतच चुरस वाढली आहे. थेऊर गणातील विजयी सदस्य युवराज काकडे आणि कोरेगाव मूळ गणातील मनोज ऊर्फ कृषिराज चौधरी हे दोघेही प्रमुख दावेदार म्हणून समोर आले आहेत.
काकडे हे विकासकामांचा अनुभव आणि स्थानिक जनाधार यावर भर देत सभापतीपदासाठी जोरदार लॉबिंग करत आहेत. तर चौधरी यांनी संघटनात्मक ताकद आणि कार्यकर्त्यांच्या पाठबळावर आपला दावा मजबूत केल्याची चर्चा आहे. त्यामुळे राष्ट्रवादीतच ‘मैत्रीपूर्ण स्पर्धा’ निर्माण झाली असून पडद्यामागील बैठका, फोनाफोनी आणि राजकीय गणिते वेगाने बदलताना दिसत आहेत.
दरम्यान, गटनेतेपदी युवराज वांजळे यांची झालेली निवड ही आगामी सत्तासमीकरणाची नांदी मानली जात आहे. त्यामुळे हवेली तालुक्याच्या राजकारणाचे तापमान वाढले असून येत्या काही दिवसांत सभापतीपदाची माळ नेमकी कोणाच्या गळ्यात पडणार, याकडे संपूर्ण तालुक्याचे लक्ष लागले आहे.
