पुणे: पुणे शहरातील हडपसर परिसरात एका डिलिव्हरी बॉयला अमानुष (Hadapsar News) मारहाण करण्यात आल्याची धक्कादायक घटना समोर आली आहे. शेवाळवाडी (Shewalewadi News) येथील जॉयवीला सोसायटीत न विचारता लिफ्टपर्यंत गेल्याच्या कारणावरून ही (Pune Crime) मारहाण करण्यात आली. या प्रकरणी हडपसर पोलीस ठाणे येथे सोसायटीचे चेअरमन, चार वॉचमन आणि अन्य दोन जणांविरोधात गुन्हा दाखल करण्यात आला आहे. (Latest Marathi News)
या प्रकरणात अक्षय साहेबराव झेंडे, वय 29, राहणार कदमवाक वस्ती, इंदिरानगर, लोणीकाळभोर, यांनी पोलिसांकडे फिर्याद दिली आहे. हडपसर पोलीस ठाण्यात भान्यास कलम 118(1), 324(2), 189(2), 190, 351(2), 352 अंतर्गत गुन्हा नोंदवण्यात आला आहे.
फिर्यादी अक्षय झेंडे हे फूड डिलिव्हरीचे काम करतात. जेवणाचे पार्सल देण्यासाठी ते जॉयवीला सोसायटीमध्ये गेले होते. त्यावेळी सोसायटीतील दोन वॉचमन आणि दोन व्यक्तींनी त्यांना अडवले. न विचारता लिफ्टपर्यंत का गेलास, असे म्हणत त्यांनी शिवीगाळ करत मारहाण सुरू केली. त्यानंतर त्यांनी सोसायटीच्या चेअरमनला फोन करून माहिती दिली. फोनवरून चेअरमननेही त्याला मारा, असे म्हणत चिथावणी दिल्याचा आरोप फिर्यादीत करण्यात आला आहे.
यानंतर दुसऱ्या गेटवरील दोन वॉचमन यांनीही अक्षय झेंडेला पुन्हा मारहाण केली. काही वेळाने चेअरमन स्वतः तेथे आले आणि त्याने पुन्हा मारहाण करण्यास सांगितल्याने सर्वांनी लाथाबुक्यांनी अक्षयला मारहाण केली. मारहाणीतून सुटून अक्षय परत जात असताना लॉबीमधील दोन अन्य व्यक्तींनी दुचाकीवरून येत पाठीमागून त्यांना धडक दिली. खाली पडल्यावर एका व्यक्तीने लोखंडी रॉडने त्यांच्या डोक्यावर वार केल्याने ते गंभीर जखमी झाले.
या ठिकाणी पुन्हा चेअरमन आल्याचे फिर्यादीत नमूद आहे. त्यावेळी एका व्यक्तीने फॉरच्युनरच्या डिक्कीत घालून याला मारून टाका, असे म्हणत चेअरमनला चिथावणी दिल्याचा गंभीर आरोपही फिर्यादीत करण्यात आला आहे. या घटनेमुळे डिलिव्हरी कर्मचाऱ्यांच्या सुरक्षेचा प्रश्न पुन्हा एकदा ऐरणीवर आला असून पोलीस पुढील तपास करत आहेत.
