लोणी काळभोर, ता. 26: आपल्यात उत्साह ध्यास आणि जगात बदल घडविण्याची प्रबळ इच्छाशक्ती असेल तर कुठलीही गोष्ट अशक्य नसते. हे पुण्यातील 22 सायकलपटुंनी सिद्ध करून दाखविले आहे. पुणे ते ओडिशातील श्री जगन्नाथ पुरी मंदिरापर्यंतची सुमारे 1610 किलोमीटरचा खडतर प्रवास अवघ्या दहा दिवसात यशस्वीरीत्या पूर्ण करून किमया करून दाखवली आहे. या कामगिरीमुळे सह्याद्री सायकल रायडर्सच्या सायकलपटूंचे पुणे जिल्ह्यातील सर्वच स्तरातून भरभरून कौतुक होत आहे.
गिरीश कुलकर्णी, चेतन कोठावडे, महेंद्र भिंडे, युवराज दळवी, योगेश सातव, संदीप डफळ, पूनम रणदिवे, ऋषिकेश पाटील, उमेश टकले, राजकुमार देमान्ना, तेजस फाटक, सुनील बलकवडे, स्नेहल शिनगारे, आनंद देशपांडे, योगेश बिडकर, श्रीकांत तांगुंदे, अश्विन जोगदेव, संदीप म्हस्के, शिवाजी काळे, सुनील दिवे व पंकज जोशी असे सायकलवर मोहीम पूर्ण करणाऱ्या सायकलपटूंची नावे आहेत.
सह्याद्री सायकल रायडर्सचे सायकलपटू हे कदमवाकवस्ती, शेवाळवाडी व हडपसर परिसरातील आहेत. 22 जणांच्या सायकलपटूंच्या ग्रुपने पुणे ते ओडिशातील श्री जगन्नाथ पुरी मंदिरापर्यंत सायकलवारी करण्याचे ठरवले होते. त्यानुसार या सायकलवारीला पुण्यातून 13 डिसेंबरला सुरुवात झाली. पुणे, सोलापूर, बसवकल्याण, हैद्राबाद, खम्मम, देवरपल्ली, पिठापुरम, विशाखापट्टणम, कासीबुगा, चिल्का असा प्रवास करत 22 डिसेंबर रोजी हे सर्व सायकलपटू श्री जगन्नाथ पुरी येथे पोहोचले.
या प्रवासादरम्यान त्यांनी पिठापुरम येथील श्री वल्लभ विठ्ठल मंदिर, श्री सत्यनारायण मंदिर यांसह अनेक धार्मिक स्थळांना भेट देऊन दर्शन घेतले. पाच राज्यांतून करण्यात आलेल्या या दीर्घ व आव्हानात्मक प्रवासादरम्यान सर्व सायकलपटूंनी एकमेकांची विशेष काळजी घेत शिस्तबद्धता, संयम आणि संघभावना जपत हा उपक्रम यशस्वी केला. श्री जगन्नाथ पुरी येथे पोहोचल्यानंतर सर्व सायकलपटूंनी प्रभू जगन्नाथाचे दर्शन घेत आनंद व समाधान व्यक्त केले.
सायकलपटूंचे होतेय सर्वत्र कौतुक
पुण्यातील 22 सायकल पटू विविध क्षेत्रात कार्यरत आहेत. मात्र या सर्वांची एकमेकांशी घट्ट मैत्री आहे. या सायकलपटूंनी अवघ्या 10 दिवसात 1610 किलोमीटर अंतर सायकलवरून केले आहे. रोज त्यांनी जवळजवळ 160 किलोमीटर अंतर पूर्ण करून एक नवा विक्रम केला आहे. त्यामुळे या 22 सायकलपटूंचे जिल्ह्यात कौतुक होत आहे. तसेच त्यांच्यावर सामाजिक, राजकीय, शैक्षणिक व पत्रकारिता क्षेत्रातील नागरिकांकडून भरभरून कौतुक होत आहे.
