प्रतिनिधी विशाल शिंदे
Bhor Crime: भोर : भोर तालुक्यातील नसरापूर येथे भरदिवसा चहाच्या दुकानात सत्तूर काढून हल्ला करण्याचा प्रयत्न झाल्याची धक्कादायक घटना घडली असून, या घटनेत फिर्यादीच्या हाताला जखम झाली आहे. या प्रकरणी राजगड पोलिस ठाण्यात गंभीर स्वरूपाचा गुन्हा दाखल करण्यात आला असून, परिसरात भीतीचे वातावरण निर्माण झाले आहे.
याबाबत सविस्तर माहिती अशी की, फिर्यादी सचिन मानसिंग जाधव (वय ३४, व्यवसाय – शेती, रा. नायगाव, ता. भोर) हे सोमवार, दिनांक ५ जानेवारी २०२६ रोजी सकाळी १०.४५ वाजण्याच्या सुमारास आपल्या मित्रांसोबत नसरापूर येथील बनेश्वर मंदिरात दर्शनासाठी गेले होते. यावेळी मंदिर परिसरात चप्पल काढण्याच्या कारणावरून त्यांचा मंगेश हणुमंत शिंदे (रा. देगाव, ता. भोर) याच्याशी शाब्दिक वाद झाला.
वादानंतरही आरोपी शांत न होता काही वेळातच त्याने फिर्यादी यांच्या चारचाकी वाहनाला नसरापूर येथील जानकीराम मंगल कार्यालयाजवळ आपली बुलेट दुचाकी आडवी लावून अडवले. त्यानंतर फिर्यादी हे नसरापूर येथील एका चहाच्या दुकानात मित्रांसोबत चहा पित असताना आरोपी तेथे पोहोचला.
यावेळी आरोपीने मफलरमध्ये गुंडाळून आणलेला धारदार सत्तूर अचानक बाहेर काढून फिर्यादीवर हल्ला करण्याचा प्रयत्न केला. आपला जीव वाचवण्यासाठी फिर्यादींनी आरोपीच्या हातातील सत्तूर पकडण्याचा प्रयत्न केला असता, त्या झटापटीत फिर्यादीच्या डाव्या हाताच्या मधल्या बोटाला जखम झाली. तसेच आरोपीने फिर्यादीला जीवे ठार मारण्याची धमकी दिल्याचे तक्रारीत नमूद करण्यात आले आहे.
या घटनेनंतर फिर्यादी यांनी तात्काळ राजगड पोलिस ठाण्यात धाव घेत तक्रार दाखल केली. पोलिसांनी आरोपीविरुद्ध आर्म अॅक्ट तसेच भारतीय न्याय संहितेच्या संबंधित गंभीर कलमांन्वये गुन्हा दाखल केला आहे. या प्रकरणाचा तपास पोलीस हवालदार तळपे करीत असून, दाखल अंमलदार म्हणून मपोहवा निकम यांनी कारवाई केली आहे.
दरम्यान, नसरापूर परिसरातील नागरिकांमध्ये या घटनेनंतर तीव्र संताप व्यक्त केला जात आहे. संबंधित आरोपी यापूर्वीही विविध गावांमध्ये लोकांना त्रास देणे, शिवीगाळ करणे व दहशत निर्माण करणे यासाठी ओळखला जात असल्याचे नागरिकांचे म्हणणे आहे. त्याच्यावर यापूर्वीही काही गुन्हे दाखल असल्याची चर्चा असून, अशा प्रवृत्तीच्या व्यक्तीवर कठोरात कठोर कारवाई करण्यात यावी, तसेच भविष्यात नसरापूर व परिसरातील नागरिकांना कोणताही त्रास होणार नाही याची दक्षता घ्यावी, अशी जोरदार मागणी होत आहे.
पोलीस प्रशासन या प्रकरणाचा सखोल तपास करीत असून, पुढील कायदेशीर कारवाई सुरू असल्याचे सांगण्यात आले आहे
