भोर, इम्रान आत्तार
Pune : पुणे जिल्ह्यातील भोर तालुक्यात अवकाळी पावसामुळे झालेल्या शेतीच्या नुकसानीची पाहणी करण्यासाठी राज्याचे कृषिमंत्री दत्तात्रय भरणे यांनी दौरा केला. वडगाव डाळ येथे पाहणीदरम्यान घडलेली एक घटना मात्र लक्षवेधी ठरली.
शेतकऱ्यांच्या नुकसानीचा आढावा घेण्यासाठी मंत्री भरणे गावात पोहोचले असताना अचानक वादळी वाऱ्यासह जोरदार गारांचा पाऊस सुरू झाला. परिस्थिती इतकी गंभीर होती की, मुसळधार पावसामुळे ते सुमारे 20 मिनिटे गाडीतच थांबून राहिले. पावसाचा जोर कमी होण्याची वाट पाहूनही परिस्थितीत सुधारणा न झाल्याने त्यांनी थेट गाडीतून उतरून भर पावसातच शेतात जाण्याचा निर्णय घेतला.
कृषी आणि महसूल विभागाच्या अधिकाऱ्यांसोबत त्यांनी पावसातच नुकसानग्रस्त पिकांची पाहणी केली. शेतकऱ्यांशी थेट संवाद साधत त्यांनी त्यांच्या अडचणी, नुकसानाची तीव्रता आणि तातडीच्या गरजा जाणून घेतल्या. गारपिटीमुळे उभ्या पिकांचे मोठ्या प्रमाणात नुकसान झाल्याचे प्राथमिक पाहणीत समोर आले.
या वेळी बोलताना भरणे यांनी शेतकऱ्यांना दिलासा देत सांगितले की, शासन त्यांच्या पाठीशी ठामपणे उभे आहे. नुकसानीचा अहवाल मिळाल्यानंतर मदत प्रक्रिया तातडीने सुरू करण्यात येईल आणि शेतकऱ्यांना लवकरात लवकर आर्थिक सहाय्य दिले जाईल, असे त्यांनी स्पष्ट केले.
अवकाळी पाऊस आणि गारपिटीमुळे आधीच संकटात सापडलेल्या शेतकऱ्यांसाठी हा दौरा महत्त्वाचा मानला जात आहे. प्रशासनाने वेगाने पंचनामे पूर्ण करून मदत जाहीर करण्याची अपेक्षा व्यक्त केली जात आहे.
