पुणे: स्वारगेट भागातील शालोम (Pune Crime) सोसायटीत एका रहिवासी (Pune News) महिलेवर वाढदिवस साजरा करणाऱ्या दोन व्यक्तींनी शिवीगाळ आणि धक्काबुक्की केली, अशी घटना समोर आली आहे. या प्रकरणी स्वारगेट पोलिस ठाण्यात एका आरोपीविरुद्ध गुन्हा दाखल करण्यात आला असून तपास सुरू आहे.
पोलिसांनी दिलेल्या माहितीनुसार, तक्रारदार महिला शंकरशेठ रस्त्यावरील शालोम सोसायटीत राहते. आरोपी आणि त्याचा मित्र देखील याच सोसायटीत राहतात. 13 ऑक्टोबर रोजी आरोपी आणि त्याचा मित्र सोसायटीच्या प्रवेशद्वाराजवळ दारू पित वाढदिवस साजरा करत होते. त्यांनी तेथे केक कापला आणि मोठ्याने आरडाओरडा सुरू केला. हा गोंधळ ऐकून महिलेने त्यांना जाब विचारला असता त्यांनी तिच्याशी वाद घालून शिवीगाळ केली आणि धक्काबुक्की केली. पोलिसांनी महिलेची तक्रार नोंदवली असून उपनिरीक्षक शिरसाट प्रकरणाचा तपास करत आहेत.
शहरात अशा प्रकारच्या घटनांचे प्रमाण वाढल्याचे दिसून येत आहे. नुकतेच कोथरूडमधील मयूर कॉलनीतही सोसायटीच्या प्रवेशद्वाराजवळ वाढदिवस साजरा करणाऱ्या टोळक्याने एका ज्येष्ठ नागरिकावर शिवीगाळ आणि धक्काबुक्की केली होती. या प्रकरणी कोथरूड पोलिसांनी सहा जणांना अटक केली आणि एका अल्पवयीन मुलाला ताब्यात घेतले आहे.
गेल्या काही वर्षांत शहरात रात्री उशिरा रस्त्यावर वाढदिवस साजरे करण्याच्या घटना वाढल्या आहेत. भर चौकात किंवा सोसायटीच्या गेटसमोर केक कापणे, फटाके वाजविणे, दारू सेवन करून आरडाओरडा करणे यामुळे रहिवाशांना मोठा त्रास सहन करावा लागतो. काही ठिकाणी तर शस्त्र वापरून केक कापण्याची घटना देखील समोर आली आहे.
या पार्श्वभूमीवर नागरिकांकडून रात्रीच्या वेळी रस्त्यावर वाढदिवस साजरे करणाऱ्या टोळक्यांविरुद्ध कडक कारवाई करण्याची मागणी जोर धरत आहे. पोलिसांनी देखील या प्रकरणांकडे गांभीर्याने पाहण्याचे आश्वासन दिले आहे आणि असे प्रकरण पुन्हा होऊ नये यासाठी नियमबद्ध पावले उचलण्याची तयारी सुरू आहे.
