पुणे : पंतप्रधान नरेंद्र मोदी यांच्या वाढदिवसानिमित्त केंद्रीय मंत्री मुरलीधर मोहोळ यांनी पुण्यात आयोजित केलेल्या भव्य ड्रोन लाईट शोमुळे शहरातील राजकीय वातावरण चांगलेच तापले आहे. अयोध्या आणि वाराणसीनंतर महाराष्ट्रात प्रथमच ड्रोन शो आयोजित करण्यात आला होता. मात्र, आता या ड्रोन शो वर टीका करण्यात येत आहेत.
या शोमध्ये हजारो ड्रोनचा वापर करून मोदी सरकारची कामगिरी तसेच पुण्याचा ऐतिहासिक वारसा दाखवण्यात आला होता. हा शो पाहण्यासाठी मोठ्या संख्येने पुणेकर उपस्थित होते. मात्र, या शोसाठी करण्यात आलेल्या कोट्यवधींच्या खर्चावरून टीका होत आहे. शिवसेनेचे (उद्धव बाळासाहेब ठाकरे) नेते वसंत मोरे (Vasant More) यांनी या खर्चावर थेट प्रश्नचिन्ह उपस्थित केले आहेत. एक हजार ड्रोनच्या अर्ध्या तासाच्या शोसाठी एक कोटी रुपये खर्च करण्यात आल्याचा दावा त्यांनी केला आहे.
काय म्हणाले वसंत मोरे? (Vasant More)
वसंत मोरे म्हणाले, ‘या पैशातून पुण्यातील ससून रुग्णालयात अनेक महत्त्वाची कामे झाली असती. ड्रोन उडवताना पुण्याचे खड्डे आणि नागरी समस्या दिसतात का? असा थेट सवाल उपस्थित करत हवेत उडणाऱ्यांनी जमिनीवरही लक्ष द्यावे.’ असा सल्ला दिला आहे. तसेच आगामी महापालिका निवडणुकीत पुणेकर योग्य उत्तर देतील. असंही यावेळी ते म्हणाले आहेत.
दरम्यान, या कार्यक्रमासंदर्भात सोशल मीडियावर होणाऱ्या नकारात्मक टीकेच्या पोस्ट डिलिट करण्यासाठी माणसे बसवल्याचा आरोपही वसंत मोरे यांनी यावेळी केला आहे.
