पुणे : पुणे आंतरराष्ट्रीय विमानतळावर सीमाशुल्क विभागाने केलेल्या (Pune Crime) मोठ्या कारवाईत 76.58 किलो हायड्रोपोनिक गांजा जप्त करण्यात आला असून, त्याची आंतरराष्ट्रीय बाजारातील किंमत सुमारे 26.80 कोटी रुपये असल्याचे समोर आले आहे. थायलंडहून आलेल्या आयात मालामध्ये अत्यंत चतुराईने हा अमली पदार्थ लपवण्यात आला होता. (Latest Marathi News)
मिळालेल्या माहितीनुसार, हा माल चिनी बनावटीच्या खाद्यपदार्थांच्या स्वरूपात असल्याचे सांगण्यात आले होते. विशेषतः संत्र्याच्या फोडी (मँडरिन ऑरेंज) असल्याचे दाखवून तो पुण्यात आणण्यात आला होता. पांढऱ्या थर्माकोलच्या बॉक्समध्ये पॅक केलेल्या या मालाची स्कॅनिंगदरम्यान अधिकाऱ्यांना संशय आला. त्यानंतर एक बॉक्स उघडून पाहिला असता सीलबंद टिनचे डबे आढळले.
या डब्यांमध्ये सुरुवातीला मीठासारखी पांढरी पावडर दिसत होती. मात्र सखोल तपासणी केली असता त्या पावडरमध्ये व्हॅक्यूम सीलबंद पारदर्शक पॅकेट्समध्ये हायड्रोपोनिक गांजा लपवून ठेवण्यात आल्याचे स्पष्ट झाले. संपूर्ण माल तपासल्यानंतर एकूण 76.58 किलो गांजा जप्त करण्यात आला.
या प्रकरणी सीमाशुल्क विभागाने तातडीने कारवाई करत एका आरोपीला अटक केली आहे. पुढील तपास सुरू असून, या मागे मोठे आंतरराष्ट्रीय जाळे कार्यरत असल्याची शक्यता नाकारता येत नाही.
गेल्या काही महिन्यांत थायलंडमधून पुण्यात हायड्रोपोनिक गांजाची तस्करी वाढल्याचे दिसून येत आहे. त्यामुळे हा माल शहरात कोणाकडे पोहोचतो, त्याचे वितरण कसे होते आणि त्यामागील साखळी किती मोठी आहे, याचा सखोल तपास आवश्यक ठरत आहे. यासाठी सीमाशुल्क विभाग आणि स्थानिक पोलिसांमध्ये अधिक समन्वयाची गरज आहे.
हायड्रोपोनिक गांजा हा विशेष तंत्रज्ञानाद्वारे, मातीशिवाय नियंत्रित वातावरणात पिकवला जातो. या पद्धतीमुळे त्याची गुणवत्ता आणि नशेची तीव्रता जास्त असते, त्यामुळे आंतरराष्ट्रीय बाजारात त्याची मोठी मागणी आणि किंमत असते.
