पुणे: नाशिकमधील तथाकथित ‘कॅप्टन’ अशोक खरात (Rupali Chakankar) प्रकरणाने मोठी खळबळ उडवली असताना या संपूर्ण प्रकरणाच्या केंद्रस्थानी आता रूपाली चाकणकर यांचे नाव (Ashok Kharat) चर्चेत आले आहे. महिला आयोगाच्या अध्यक्ष असलेल्या चाकणकर या सिन्नर तालुक्यातील ‘श्री शिवनिका संस्थान’ ट्रस्टशी संबंधित असल्याने या प्रकरणाकडे अधिक गांभीर्याने पाहिले जात आहे. (Latest Marathi News)
अशोक खरात याच्यावर एका महिलेवर गुंगीचे औषध देऊन अत्याचार केल्याचा आरोप असून त्याला क्राइम ब्रांचने अटक केली आहे. मात्र तपासादरम्यान समोर आलेल्या माहितीमुळे केवळ गुन्ह्यापुरतेच हे प्रकरण मर्यादित न राहता त्याचे सामाजिक आणि राजकीय परिणामही चर्चेत आले आहेत. अनेक प्रभावशाली व्यक्ती या संस्थानाशी जोडल्या गेल्याचे उघड झाल्यानंतर प्रश्नचिन्ह निर्माण झाले आहे.
या पार्श्वभूमीवर रूपाली चाकणकर यांनी स्पष्ट भूमिका घेतली आहे. त्यांनी सांगितले की, शिवनिका संस्थान हा महादेव देवस्थान ट्रस्ट असून विविध सामाजिक उपक्रमांमुळे अनेक जण त्याच्याशी जोडले गेले होते. “अशोक खरात यांच्या वैयक्तिक आयुष्याबद्दल किंवा त्यांच्यावर झालेल्या आरोपांबाबत मला कोणतीही माहिती नव्हती,” असे त्यांनी स्पष्ट केले. तसेच या प्रकरणात पोलिस निष्पक्ष तपास करतील, असा विश्वासही त्यांनी व्यक्त केला.
सध्या या प्रकरणाचा पोलिस तपास सुरू असून पुढील चौकशीत आणखी माहिती समोर येण्याची शक्यता आहे. मात्र या घटनेमुळे सार्वजनिक जीवनातील व्यक्तींनी जोडलेल्या संस्थांची पारदर्शकता आणि जबाबदारी या मुद्द्यांवर पुन्हा एकदा चर्चा सुरू झाली आहे.
