पुणे: महापालिका निवडणुकीत भारतीय (Pune Politics) जनता पक्षाचा पराभव झाला तर (Pune Mahapalika Nivadnuk) त्याचे खापर आपल्यावर फुटेल, या भीतीने केंद्रीय सहकार राज्यमंत्री (Murlidhar Mohol) मुरलीधर मोहोळ घाबरले आहेत, अशी जोरदार टीका राष्ट्रवादी काँग्रेस (शरद पवार) पक्षाचे पुणे निवडणूक प्रभारी आमदार रोहित पवार (MLA Rohit Pawar) यांनी शुक्रवारी केली. गुंड नीलेश घायवळ (Nilesh Ghaiwal) याला पारपत्र देण्याच्या विषयावरून मोहोळ यांनी उपमुख्यमंत्री अजित पवार (Ajit Pawar) यांना चॅलेंज दिले आहे. मात्र दादांना कशाला चॅलेंज करता, गुंडाच्या पारपत्राबाबत मीच तुमच्याशी बोलायला तयार आहे, अशी टिप्पणीही रोहित पवार यांनी केली. (Latest Marathi News)
राष्ट्रवादी काँग्रेस आघाडीच्या उमेदवारांच्या प्रचारासाठी वारजे परिसरात आले असताना रोहित पवार यांनी पत्रकारांशी संवाद साधताना मोहोळ यांच्यावर निशाणा साधला. ते म्हणाले की, कोणताही प्रकल्प सुरू करण्यापूर्वी त्यासाठी परवानगी घ्यावी लागते. याबाबत अजित पवार आपली भूमिका मांडत होते. मात्र भाजपकडून शहरात सुरू असलेल्या बांधकाम प्रकल्पांना आणि विविध व्यवसायांना अडचणी निर्माण केल्या जात आहेत. ठेकेदार आणि व्यावसायिकांना धमक्या दिल्या जात असल्याचा आरोपही त्यांनी केला.
भाजपमुळे पुणे आणि पिंपरी चिंचवड शहराची अक्षरशः वाताहत झाली आहे. शहराचा ज्या पद्धतीने विकास व्हायला हवा होता, तसा विकास सत्ताधाऱ्यांनी केला नाही. आमदार महेश लांडगे भाषणात बांगड्या भरल्या नाहीत असे वक्तव्य करतात, यातून महिलांचा अपमान होत असल्याचे स्पष्ट दिसते. आमदार लांडगे यांचा खरा चेहरा आता जनतेसमोर येऊ लागला असून त्यामुळेच तेही घाबरले असल्याची टीका रोहित पवार यांनी केली.
मोहोळ यांचा दिल्लीतील संपर्क वाढला आहे. त्यांच्या या संपर्कातून नेमका कोणी त्यांचा गेम केला हे सुद्धा आम्ही सांगू शकतो, अशी सूचक टिप्पणी करत रोहित पवार यांनी भाजपवर जोरदार हल्लाबोल केला. महापालिका निवडणुकीच्या पार्श्वभूमीवर पुण्यातील राजकीय वातावरण तापले असून आरोप-प्रत्यारोपांची मालिका सुरू झाली आहे.
