पुणे: पुण्यात (Pune News) महानगरपालिका निवडणुकांचे वारे वाहू लागले असून याच दरम्यान एक मोठी राजकीय घडामोड घडली आहे. राष्ट्रवादी काँग्रेसचे नेते रोहित पवार आणि खासदार अमोल कोल्हे यांनी काल रात्री उपमुख्यमंत्री अजित पवार यांची त्यांच्या पुण्यातील निवासस्थानी जाऊन भेट घेतली. या भेटीमुळे राजकीय वर्तुळात मोठी चर्चा सुरू झाली आहे. या बैठकीत दोन्ही पक्षांनी एकत्र निवडणूक लढवल्यास होणाऱ्या फायद्यावर सविस्तर चर्चा केल्याची माहिती समोर येत आहे. विशेषतः पिंपरी चिंचवडमधील जागा वाटपाबाबत येत्या २ दिवसात अंतिम निर्णय होण्याची शक्यता वर्तवण्यात आली आहे.
दरम्यान, आमदार रोहित पवार यांनी मात्र भेटीचे वृत्त फेटाळून लावले आहे. पत्रकारांशी संवाद साधताना त्यांनी सांगितले की, अमोल कोल्हे हे काही कार्यकर्त्यांसह अजित पवारांना भेटायला गेले होते आणि मी स्वतः दिवसभर भीमथडी जत्रेच्या नियोजनात व्यस्त होतो. निवडणुकीच्या काळामध्ये रणनीती गुप्त ठेवण्यासाठी कदाचित त्यांनी ही भूमिका घेतल्याचे बोलले जात आहे. मात्र अजित पवारांच्या बंगल्याबाहेरचे काही फोटो समोर आले असून त्यात रोहित पवार स्पष्टपणे गाडीतून उतरताना आणि बंगल्यात जाताना दिसत आहेत. या फोटोंमुळे रोहित पवार यांच्या दाव्यावर आता प्रश्नचिन्ह उपस्थित केले जात आहे.
या बैठकीनंतर अजित पवारांच्या बंगल्यातून बाहेर पडताना रोहित पवार यांची गाडी अत्यंत वेगात होती. प्रसारमाध्यमांच्या प्रतिनिधींना टाळण्यासाठी त्यांनी दुसऱ्या गाडीचा वापर केला होता. ही गाडी वेगाने भीमथडी जत्रेच्या ठिकाणी पोहोचली, जिथे रोहित पवार गाडीतून खाली उतरले. राजकारणात या गुप्त भेटीने मोठी खळबळ उडवून दिली असून स्थानिक राजकारणाची गणिते पूर्णपणे बदलण्याची शक्यता व्यक्त केली जात आहे.
