पुणे: पुणे शहरात वाहतुकीचे नियम धाब्यावर बसवून ई-चलनाकडे (Pune News) दुर्लक्ष करणाऱ्या वाहनचालकांसाठी महत्वाची बातमी समोर आली आहे. प्रलंबित असलेला लाखो रुपयांचा दंड वसूल करण्यासाठी पुणे वाहतूक पोलिसांनी आता कडक पाऊल उचलले आहे. पुण्यात मार्च 2019 पासून ई-चलन प्रणाली सुरू झाली. सीसीटीव्ही कॅमेऱ्यांच्या मदतीने नियम मोडणाऱ्यांवर कारवाई तर झाली, पण हजारो चालकांनी या दंडाला गांभीर्याने घेतले नाही. दरम्यान, आता जर तुम्ही येत्या 30 दिवसांत थकीत दंड भरला नाही, तर तुमचे ड्रायव्हिंग लायसन्स (परवाना) कायमस्वरूपी रद्द होऊ शकते.
केवळ लायसन्सच नाही, तर दंड न भरल्यास हे प्रकरण थेट न्यायालयात वर्ग केले जाणार असून जे चालक नोटीस मिळूनही ३० दिवसांत पैसे भरणार नाहीत, त्यांची नावे थेट आरटीओकडे परवाना रद्द करण्यासाठी पाठवली जाणार आहेत.
फसवणूक टाळण्यासाठी ‘हे’ लक्षात ठेवा
डिजिटल युगात सायबर गुन्हेगार पोलिसांच्या नावाचा वापर करून फसवणूक करू शकतात. त्यामुळे खालील गोष्टींकडे लक्ष द्या:
-
अधिकृत मेसेज: तुम्हाला केवळ MHPECH-G या शॉर्ट कोडवरूनच अधिकृत एसएमएस येईल.
-
ठराविक कालावधी: हे मेसेज फक्त 26 फेब्रुवारी ते 1 मार्च 2026 या दरम्यानच पाठवले जाणार आहेत.
-
सावध राहा: पोलीस कधीही तुम्हाला ‘APK’ फाईल पाठवत नाहीत किंवा ‘OTP’ मागत नाहीत. फसवणूक झाल्यास त्वरित सायबर पोलिसांशी संपर्क साधा.
दंड कुठे आणि कसा भरावा?
वेबसाइट: mahatrafficechallan.gov.in वर जाऊन गाडीचा नंबर टाका.
अॅप: ‘Pune Traffic Police App’ (PTP) डाऊनलोड करून डिजिटल पेमेंट करा.
ऑफलाइन: जवळच्या वाहतूक विभागात जाऊन ई-चलन मशीनवर कार्ड किंवा QR कोडने पैसे भरा.
वाहनधारकांनो, ही शेवटची संधी समजा; कारण एकदा का परवाना रद्द झाला किंवा प्रकरण न्यायालयात गेले, तर कायदेशीर कचाट्यातून सुटणे कठीण होईल. त्यामुळे आपला थकीत दंड त्वरित तपासा आणि भरा.
