पुणे: पुणे (Pune News) पोलीस दलाची प्रतिमा मलीन करणाऱ्या आणि शिस्त मोडणाऱ्या कर्मचाऱ्यांविरुद्ध पोलीस आयुक्त अमितेश कुमार यांनी आता मोठा बडगा उगारला आहे. पोलीस आयुक्तालयात जनसंपर्क अधिकारी म्हणून महत्त्वाची जबाबदारी सांभाळणाऱ्या एका सहाय्यक फौजदाराला तडकाफडकी निलंबित करण्यात आले आहे. प्रवीण विठ्ठल घाडगे असे कर्मचाऱ्याचे नाव असून, ते पुणे पोलिसांच्या भरोसा सेलमध्ये कार्यरत होते. आपल्या पदाचा आणि अधिकारांचा चुकीचा वापर केल्याचा ठपका त्यांच्यावर ठेवण्यात आला आहे.
मिळालेल्या माहितीनुसार, घाडगे यांनी एका गंभीर गुन्ह्याच्या तपासात अडथळे आणण्याचा प्रयत्न केला होता. त्यांनी आपल्या वरिष्ठ अधिकाऱ्यांना कोणतीही कल्पना न देता तपासाशी संबंधित कर्मचाऱ्यांना फोन करून त्यांच्यावर दबाव निर्माण केला.
प्रवीण घाडगे यांनी एका वादग्रस्त बांधकाम व्यावसायिकाला फायदा मिळवून देण्यासाठी आपल्या पदाचा वापर केल्याचे सिद्ध झाले आहे. तपासादरम्यान असे दिसून आले की, हा संबंधित बिल्डर अविनाश पवार याचे कुख्यात आंदेकर टोळीशी जवळचे संबंध आहेत. अशा गुन्हेगारी पार्श्वभूमी असलेल्या व्यक्तीला वाचवण्यासाठी किंवा त्याला लाभ मिळवून देण्यासाठी घाडगे यांनी तपासात हस्तक्षेप केल्याचा ठपका ठेवण्यात आला आहे.
कोणत्याही अर्जाच्या चौकशीत अनावश्यक हस्तक्षेप करणे आणि पोलीस ठाण्यातील कामात स्वतःचा प्रभाव टाकत अडथळे आणणे, असे गंभीर आरोप त्यांच्यावर करण्यात आले आहेत. हे कृत्य केवळ शिस्तभंगाचे नसून पोलीस दलाच्या नैतिक मूल्यांना धक्का देणारे असल्याचे आयुक्तालयाने स्पष्ट केले आहे.
पोलीस आयुक्त अमितेश कुमार यांनी ही कारवाई करून सर्व कर्मचाऱ्यांना इशारा दिला आहे की, वर्दीच्या आड राहून कोणतेही गैरप्रकार खपवून घेतले जाणार नाहीत. घाडगे यांचे वागणे हे सरकारी कामात बेजबाबदारपणा दाखवणारे आणि पोलिसांची प्रतिमा जनमानसात खराब करणारे ठरले आहे.
