पुणे: पुणे आणि पिंपरी-चिंचवडसारख्या (Pune Crime) आयटी आणि शिक्षण क्षेत्रातील महत्त्वाच्या शहरांमध्ये ‘स्पा आणि वेलनेस सेंटर’च्या आड सुरू असलेल्या संशयास्पद आणि अनैतिक प्रकारांवर आता थेट विधान परिषदेत चर्चा झाली आहे. गेल्या काही दिवसांत अशा केंद्रांबाबत वाढलेल्या तक्रारींमुळे हा मुद्दा गंभीर बनला असून, आमदार अमित गोरखे यांनी सभागृहात यावर जोरदार आवाज उठवला. (Latest Marathi News)
गोरखे यांनी स्पष्ट शब्दांत सांगितले की, शहरात शिक्षणासाठी येणाऱ्या तरुणांना या स्पा सेंटरच्या माध्यमातून चुकीच्या मार्गावर ओढले जात आहे. त्यांच्या मते, ही केंद्रे केवळ मसाज किंवा वेलनेसपुरती मर्यादित नसून, काही ठिकाणी अमली पदार्थांची देवाणघेवाण आणि मानवी तस्करीसारख्या गंभीर गुन्ह्यांशी संबंधित जाळे कार्यरत आहे. त्यामुळे या संपूर्ण व्यवसायावर नियंत्रण आणण्यासाठी तातडीने कठोर पावले उचलण्याची गरज त्यांनी व्यक्त केली.
या पार्श्वभूमीवर गृहराज्यमंत्री योगेश कदम यांनी महत्त्वाचे आश्वासन दिले आहे. येत्या 3 महिन्यांत स्पा व्यवसायासाठी स्वतंत्र आणि कडक नियमावली लागू केली जाईल, असे त्यांनी सांगितले. यासाठी नगरविकास आणि ग्रामविकास विभागाचा सविस्तर अहवाल मागवण्यात आला असून, परिस्थितीचा अभ्यास करण्यासाठी विशेष समितीही स्थापन करण्यात आली आहे.
पिंपरी-चिंचवड परिसरात काही संघटित गट या व्यवसायाच्या आड मोठे जाळे चालवत असल्याचेही चर्चेत आले. या प्रकरणात काही विशिष्ट टोळ्यांची नावे सभागृहात घेण्यात आली असून त्यांच्या मालमत्तांची चौकशी करून कठोर कारवाई करण्याची मागणी करण्यात आली आहे.
सरकारकडून तयार होत असलेल्या नव्या नियमावलीत सीसीटीव्ही कॅमेरे बंधनकारक करणे, कर्मचाऱ्यांची पोलीस पडताळणी, अंतर्गत रचनेत पारदर्शकता आणि कामकाजासाठी वेळेची मर्यादा घालणे यांसारखे कठोर निकष असण्याची शक्यता आहे. या उपाययोजनांमुळे स्पाच्या नावाखाली सुरू असलेल्या गैरप्रकारांवर मोठ्या प्रमाणात आळा बसण्याची अपेक्षा व्यक्त केली जात आहे.
