पुणे: पुणे शहरातील (Pune Crime) डेक्कन चौपाटी परिसरातून एक अत्यंत धक्कादायक घटना समोर आली आहे. रविवारी मध्यरात्री दोन गटांमध्ये दारू पिण्यावरून झालेल्या वादातून तुफान हाणामारी झाली. या राड्यामध्ये आरोपींनी अक्षरशः खुर्च्यांचा वापर शस्त्र म्हणून केला आणि एकमेकांच्या डोक्यात खुर्च्या मारल्या. ही मारामारी इतकी गंभीर होती की, एका व्यक्तीचे डोके फुटून तो रक्तबंबाळ झाला. या संपूर्ण घटनेचा LIVE VIDEO समोर आला आहे.
खुर्च्यांनी टार्गेट करून मारहाण
मिळालेल्या माहितीनुसार, डेक्कन चौपाटी (नदीपात्र परिसर) येथे रात्री उशिरा पार्टी सुरू असताना दारू पिण्यावरून दोन गटांत जोरदार वाद झाला. हा वाद विकोपाला जाऊन दोन्ही गटांनी एकमेकांवर खुर्च्यांची फेकाफेक सुरू केली.व्हिडिओमध्ये दिसत आहे की, काही आरोपींनी एका व्यक्तीला टार्गेट करून त्याच्या डोक्यावर सलग खुर्च्या मारल्या, ज्यामुळे खुर्च्या तुटल्या आणि त्या व्यक्तीचे डोके फुटले. जखमी अवस्थेत तो व्यक्ती जागेवर कोसळला.
पोलिसांची तातडीने कारवाई
या घटनेची माहिती मिळताच पोलिसांनी तात्काळ घटनास्थळी धाव घेतली. पोलिसांनी तातडीने रक्तबंबाळ झालेल्या पीडित व्यक्तीला उपचारासाठी रुग्णालयात दाखल केले. त्याचबरोबर, या मारहाणीत सहभागी असलेल्या काही तरुणांना पोलिसांनी घटनास्थळावरून ताब्यात घेतले.
या प्रकरणी पुणे पोलिसांनी गुन्हा दाखल केला असून, आतापर्यंत तीन आरोपींना अटक करण्यात आली आहे. डेक्कन पोलीस या घटनेचा अधिक तपास करत आहेत. नदीपात्र परिसरातील या चौपाटीवर रात्री उशिरापर्यंत चालणाऱ्या पार्ट्या आणि त्यातून होणारे राडे पुन्हा एकदा ऐरणीवर आले आहेत.
