पुणे: पुण्यातील आयटी हब (Pune Crime) म्हणून ओळखल्या जाणाऱ्या (Pune News) हिंजवडी परिसरात एक धक्कादायक प्रकार उघडकीस आला आहे. एका आलिशान सदनिकेत अत्याधुनिक हायड्रोपोनिक पद्धतीने गांजाची लागवड करून त्याची विक्री केली जात असल्याचे तपासात समोर आले आहे. या प्रकरणात पुणे पोलीस यांनी कारवाई करत पाच उच्चशिक्षित तरुणांना अटक केली असून सुमारे 3.5 कोटी रुपये किमतीचा अमली पदार्थांचा साठा जप्त करण्यात आला आहे. (Latest Marathi News)
सापळा रचून आरोपी ताब्यात
पोलिसांना मिळालेल्या गोपनीय माहितीनुसार तुषार वर्मा हा अमली पदार्थांची विक्री करत असल्याचा संशय होता. त्यानुसार खडकी परिसरात सापळा रचून त्याला ताब्यात घेण्यात आले. चौकशीदरम्यान त्याचे साथीदार सुमीत डेडवाल आणि अक्षय महेर हे पिंपरी-चिंचवड परिसरात राहत असल्याची माहिती मिळाली. पुढील तपासात या तिघांसह आणखी दोन जण या रॅकेटमध्ये सहभागी असल्याचे स्पष्ट झाले.
हायड्रोपोनिक तंत्रज्ञानाच्या साहाय्याने लागवड
सखोल तपासात आरोपींनी हिंजवडी येथील एका सदनिकेत भाड्याने वास्तव्य करून तेथे हायड्रोपोनिक तंत्रज्ञानाच्या साहाय्याने गांजाची लागवड केल्याचे निष्पन्न झाले. या पद्धतीत विशेष प्रकाश व्यवस्था, तापमान नियंत्रण आणि पाण्याचा मर्यादित वापर करून गांजा पिकवला जात होता. सदनिकेत सर्व व्यवस्था अत्यंत नियोजनबद्ध पद्धतीने करण्यात आल्याचे पोलिसांनी सांगितले.
दोन तरुण हे गंगापूर तालुक्यातील
या प्रकरणातील पाच आरोपींपैकी दोन तरुण हे गंगापूर तालुक्यातील असल्याचे समोर आल्याने स्थानिक पातळीवर तीव्र प्रतिक्रिया उमटल्या आहेत. गंगापूर येथील सुमीत संतोष डेडवाल आणि अक्षय सुखलाल महेर यांचा या गुन्ह्यात सहभाग असल्याची माहिती पोलिसांनी दिली आहे. पोलिसांकडून आरोपींच्या संपर्कातील इतर व्यक्ती आणि विक्रीचे जाळे यांचा तपास सुरू असून पुढील कारवाई करण्यात येणार असल्याचे सांगण्यात आले आहे.
