Pune Crime : आळंदी : आळंदी येथे आत्महत्येचा (Suicide) बनाव करून हत्या लपवण्याचा प्रयत्न करणाऱ्या मुख्य आरोपीला पोलिसांनी अटक (Arrest) केली आहे. विष्णू महादेव पावडे असे अटक करण्यात आलेल्या आरोपीचे नाव आहे. या घटनेमुळे परिसरात खळबळ उडाली आहे. आळंदी पोलिसांनी तातडीने कारवाई करत आरोपीला ताब्यात घेतले असून पुढील तपास सुरू आहे.
मिळालेल्या माहितीनुसार, पार्वती दराडे आणि विष्णू पावडे यांच्यात मागील 6 महिन्यांपासून विवाहबाह्य संबंध होते. दोघेही एकत्र कामावर ये-जा करत असत. 20 फेब्रुवारी रोजी ते कामानिमित्त बाहेर पडले असता सोळू गावाजवळील जंगल परिसरात थांबले. तेथे जेवताना दोघांमध्ये काही कारणावरून वाद झाला. या वादातून विष्णू पावडे याने संतापाच्या भरात पार्वती दराडे यांचा गळा आवळून खून केला.
हत्या केल्यानंतर हा प्रकार आत्महत्या असल्याचे भासवण्यासाठी आरोपीने पार्वती यांच्या गळ्याभोवती स्कार्फ गुंडाळला आणि त्याचे दुसरे टोक झाडाला बांधले. त्यामुळे आत्महत्या केल्याचा आभास निर्माण होईल, असा त्याचा प्रयत्न होता. त्यानंतर आरोपीने आपल्या आईला फोन करून पार्वतीने आत्महत्या केल्याचे सांगितले आणि स्वतःही आत्महत्या करणार असल्याचे सांगून तेथून पळ काढला.
पोलिसांची सखोल चौकशी अन् समोर आली धक्कादायक माहिती
घटनेची माहिती मिळताच आळंदी पोलिसांनी घटनास्थळी पोहोचून पंचनामा केला. सुरुवातीपासूनच हा प्रकार संशयास्पद वाटत असल्याने पोलिसांनी सखोल तपास सुरू केला. तपासादरम्यान हा आत्महत्येचा प्रकार नसून हत्या असल्याचे स्पष्ट झाले. पोलिसांनी आरोपीचा शोध घेत काही तासांतच सोळू गावाच्या हद्दीतून त्याला अटक केली.
पोलिस तपासात असेही समोर आले की, पार्वती यांच्या वैवाहिक आयुष्यातील अडचणींमुळे त्या विष्णूच्या संपर्कात आल्या होत्या. मात्र, दोघांमध्ये वारंवार वाद होत असल्याने अखेर हा गंभीर प्रकार घडला. या प्रकरणी पोलिसांनी गुन्हा दाखल केला असून पुढील तपास पोलीस उपनिरीक्षक कुमार कोंडीबा गिरीगोसावी करत आहेत.
