प्रतिनिधी अमित मुंडीक
Pune : पुणे शहरात वाढत्या अपघातांना आळा घालण्यासाठी आणि वाहतूक शिस्त अबाधित ठेवण्याच्या उद्देशाने पुणे शहर वाहतूक विभागाकडून मद्यपान करून वाहन चालवणाऱ्या चालकांविरुद्ध तीन दिवसांची विशेष मोहीम राबविण्यात आली.
दिनांक १९ डिसेंबर २०२५ ते २१ डिसेंबर २०२५ या कालावधीत शहरातील विविध भागांमध्ये एकूण ३० ठिकाणी नाकाबंदी पॉईंट उभारून वाहन तपासणी करण्यात आली. या कारवाईदरम्यान मद्यप्राशन करून वाहन चालवणाऱ्या २०१ वाहनचालकांविरुद्ध कायदेशीर कारवाई करण्यात आली आहे.
संबंधित चालकांवर मोटार वाहन कायद्यानुसार दंडात्मक कारवाई तसेच पुढील कायदेशीर प्रक्रिया राबविण्यात आली आहे. वाहतूक पोलिसांच्या या विशेष मोहिमेमुळे शहरातील वाहतूक सुरक्षेला बळकटी मिळाली आहे.
पुणे शहर वाहतूक विभागाने नागरिकांना आवाहन केले आहे की, मद्यप्राशन करून वाहन चालवणे हा गंभीर गुन्हा असून यामुळे जीवितहानीसह गंभीर अपघातांचा धोका वाढतो. त्यामुळे नागरिकांनी वाहतूक नियमांचे काटेकोर पालन करून स्वतःचा व इतरांचा जीव सुरक्षित ठेवावा.
